هتكلم عن المميزات الاول و هو ان الاوتيل نضيف جدا الموظفين هناك بشوشين جدا و لما بنطلب اي طلب بصراحة مش بيتأخره احنا كنا حاجزين اوضة sea view و لما اسكنا كانت بعيده عن البحر شوية ف طلبنا اننا نغيرها و غيرهولنا بواحدة اقرب تاني يوم علي طول اول لما فضيت، البحر صخري و فيه ممشي طويل تنزل منه بس علي مدار ال ٤ ليالي كان البحر غير مستقر و كانوا رافعين الراية الحمرا و مفيش نزول و الشط ماتقدرش تنزل منه لانه صخري و فيه مد و جزر.
نيجي بقي للعيوب:
آولاً: وصلنا الساعة ١٠ الصبح و اتسكنا خلال نص ساعة بس اللي قفلني اول لما وصلنا ان محدش وصلنا للاوض زي ما متعودة في الفنادق اللي بنطلعها ال bellman وصفلنا المبني و رقم الاوضة و قالنا روحوا انتوا وانا هبقي احصلكوا بالشنط ف سآلته ليه مفيش جولف كار؟ قال انها بايظة 🙄 ف روحنا احنا الاوضة لوحدنا و دورنا علي الاوضة.
ثانياً: الاوضة اللي روحناها كانت مفصلات الدولاب مفكوكة و اوكرة باب الحمام طلعت في ايدينا و كلمناهم و جابوا حد صلحها.
ثالثا : الاكل هناك بشع بمعني الكلمة، اولا مفيش تنوع نهائي و اللي بيتبقي من الغدا بيتحط في العشا!! و الاكل ملهوش طعم نهائي انا في وجبات كتير مكنتش باكل فيها حاجة من كتر البشاعة! يمكن وجبة الفطار هي الوحيدة اللي كويسة عشان هي basic زي كل الاوتيلات و الاكل اللي بيخلص مابينزلش منه تاني و طبعا الاكل بيخلص بسرعة عشان عدد النزلاء كبير.
ركن المكرونات بيبقي حاططلك المكرونة وايت صوص و الريد صوص علي جنب و انت اللي تغرف منهم و طبعا بيبقوا باردين و مفيش حد واقف اصلا عشان يعملك غيرها او حتي يسخنهالك، كذلك البيض المقلي معمول و محطوط كله فوق بعضه وانت خد منه و طلبت من الشيف اللي واقف يعملي واحد قريش مارضيش و قالي اللي محطوط ده لسه طالع حالا وانا مبحبش اكل البيض بارد!
العصاير و الكولا كلهم كأنك بتشرب مياه مفيش اي طعم نهائي و علي الرغم ان في ماكينات قهوة في كل الاوتيل بتعمل اسبرسو و كابتشينو و لاتيه و نسكافيه بس استغفر الله الطعم لا يمت للقهوة خالص
رابعاً: الهاوس كيبينج في يوم جيه متاخر علي الساعة ٣ عشان ينضف الاوضة كنا طلعنا و بنريح شوية و ادانا الفوط الجديدة و مشي عشان ماقدرناش اننا ندخله.
اليوم اللي بعده السرير كان كله فتافيت و رمل و مش متنفض يا دوب بس هو شد الملايات و خلاص
اليوم القبل الاخير لينا في الاوتيل لاقيت حد من ال geust relation بتكلمني عشان نحجز في مطعم ال a'la cart و كان مطعم ايطالي بصراحة الاكل فيه كان وهمي و حلو جدا يعني لو كانوا يخلوا الاكل اللي في الاوبن بوفيه بنفس المستوي كان هيبقي حلو اوي.
خامساً: في عنصرية كبيرة جدا بين المصريين و الاجانب و ال VIP يعني بيهتموا بالاجانب اكتر في كل حاجة و كمان لاحظت ان الاجانب اللي بيعملوا check out بيدوهم و هما ماشين souvenirs المصريين لا بل بالعكس حصل موقف واحنا بنعمل check out كان في حد vip هو و اسرته كل ال stuff حرفيا بما فيهم مدير الفندق كانوا واقفينله صف و الشنط اتحطت في عربيته و فضلوا واقفين صف بيعملوله باي لحد ما مشي بالعربية و في ثواني مدير الفندق راح مكلم بنفسه البوابه عشان يفتحهواله و مايفضلش واقف في حين اننا الساعة ٨ الصبح قبل ماننزل الفطار كلمت الريسبشن و بلغتهم اننا هنفطر و هنمشي و محتاجة حد يجي ياخد الشنط من الاوضة عشان علي ما نخلص فطار نعمل check out و نمشي علي طول و قالولنا حاضر، نزلنا فطرنا و روحنا عملنا check out و فضلنا مستنين شنطنا تيجي من الاوضة نص ساعة تقريباً لحد ما الراجل المهم مشي لدرجة ان كان في اسرة مصرية والله جابوا شنطهم بنفسهم و شالوها بنفسهم لحد عربيتهم ولا حد فكر يساعدهم ابدا.
لما اشتكينا لل guest relation قالتلنا للاسف ال stuff قليل جدا و النزلاء عددهم كبير ف مش ملاحقين و احنا ال rate بتاعنا فعلا قل جدا علي بوكينج من ساعة كورونا بس احنا بنحاول نبذل جهدنا اننا نرجع زي الاول تاني.
الخلاصة: الاوتيل الموظفين فيه قليلين جدا لدرجة ان اللي بيشتعل شيفت الصبح هو هو اللي بيشتغل بليل و عدد النزلاء كبير ف هما مش ملاحقين عليهم وبالتالي الخدمة ضعيفة جدا.
تجربة سيئة جدا و عمري ما هكررها تاني بصراحة، بس احنا حاولنا اننا نستمتع عشان احنا عايزين نتبسط و مانضيعش الاجازة.
2,212
475
208
116
112
