كنت في زيارة ليوم واحد في اسكندرية و قررت اختيار فندق للمبيت . كانت مجموعة هيلتون بعتتلي عضوي دايموند لتشجيعي علي تجربة سلسلة هيلتون لما بعتلهم اني عضو في اكور بلاتينم
قررت احجز في الفندق و كلمتهم فقالولي مفيش غير جونيور سويت سي سايد فيو .. فوافقت ( وياريتني ما وافقت و حقول ليه) .. وضحت برضه اني عضو هليتون دايموند عشان يدوني المميزات بتاعة العضوية
المهم وصلت الساعة ٢ .. مبدأيا مينفعش تركن عربيتك بنفسك في الجراج .. فاليه فقط و انا عادة لا افصل الفاليه خصوصا في مصر
دخلت الريسبشن و قلتلهم في حجز و انا هليتون دايموند عملتولي ترقية للغرفة قالولي لا .. طب الغرفة جاهزة قالولي لا :) .. طب اعمل ايه دلوقتي ؟ قالولي ممكن تقعد في اللاونج (صالة رجال الاعمال لحد اما الغرفة تجهز)
رحت اللاونج و يارتني مرحت .. المكان يستحق عن جدارة جايزة اسوء لاونج دخلته في فندق . مفيش تقريبا اي حاجة موجودة تاكلها او تشربها و حتي مكنة القهوة مش شغالة (شغلوها للامانة بعد شوية) .. ده غير طبعا ان الموجود اسوء انواع الشاي/القهوة/السكر .. المكان نفسه زحمة جدا و مليان عيال (المفروض اللاونج ميبقاش فيه اطفال) .. المهم ١٠ دقايق و سبته و نزلت قعدت في اللوبي
اللوبي ظريف ..و لكنه كاغلب فنادق مصر الناس بتدخن عادي .. شوية ولقيت واحد من الاستقبال بيقلي الجناح جاهز
طلعت الجناح .. الجناح مساحته معقولة و حالة الاثاث لا باس بها ... ولكن حاجات بسيطة مضيعة جزء من الفخامة .. مثلا مفيش موكيت علي الارض و الارض نفسها رخام .. فيه مكنه سبريسو بس مفيش كبسولات القهوة .. لما طلبت من خدمة الغرف قالتلي حبعتلك بس مرة واحدة في الاقامة كلها . بعد كده تدفع :) (اللمسات المصرية)
نيجي بقي للفيو او المنظر من الغرفة .. الغرفة تطل من الجنب زي اما قالوا علي البحر .. غير كده بتطل علي عمارات قديمة والشمس مش ظاهرة اغلب اليوم .. اللي عمل جناح مبيطلش علي البحر ده ظلم اللي بيقعد في الغرف ديه لان الغرف ديه اغلي من الغرف العادية
صادف اني طلعت الورقة بتاعة الفاليه و قريت الشروط لقيتهم كاتبين الاتي "الفندق غير مسئول عن اي ضرر يصيب السيارات او وفاة او ايذاء اي شخص" .. وصلت لحد كلمة وفاة ديه و قلت ايه المصيبة ديه ؟ يعني لو حد من الفاليه خبط حد بالعربية و موته هما ملهمش دعوة و انا اللي اتحمل المسئولية .. رحت قلت ده للريسبشن قالولي ده صيغة عادية (اللمسة اللمصرية) بس احنا مسئولين عن كل حاجة (طبعا وقت الجد العقد شريعة المتعاقدين ) .. المشكلة بقي انك اما تقبل بكده او تركن بره الاوتيل اللي هو تقريبا مستحيل
رحت قعد علي الشاطئ للامانة هو كويس بس للاسف هو قريب جدا من الكورنيش فالدوشة غير طبيعي .. تخيل انك قاعد في شاطئ جنبه سوق و انت حتعر قصدي ايه
اخيرا الفطار كويس و فيه كل حاجة والجودة ممتازة
الفندق ده تروحه لو لقيت غرفة علي البحر بسعر رخيص ..لكن تاخد جناح او تتوقع معاملة مميزة كعضو في برنامج مزايا هليتون فمتتعبش نفسك و تضيع فلوسك

من أفضل الأماكن إقامة في الاسكندرية من حيث الموقع والاستقبال والخدمات .
حيث موقعه علي كورنيش الاسكندرية مميز .
ويوجد به فريق استقبال جيد .
والغرف مميزه باطلاله رائعة
والخدمات جيده جدا.
والاسعار مقبولة نوعا ما