تجربتي مع مركز سلاي
انا عايشه في دهب وبجد اول مره افكر اعمل ريفيو لمكان
وده لأني انبسطت جدا الصراحه
اولا احب اقولكم أن انا عندي ١٣ سنه وغطست في ٤ اماكن غطس قبل كده من ضمنهم السنتر اللي انا اخدت معاه الاوبن ووتر وكلهم كان مش حلوين ومتبسطتش خالص
كلهم كانو غير منظمين وكنت بحس أن الناس عاوزه تخلص وخلاص أما مع المركز ده كان الموضوع مختلف خالص ، اولا المكان نضيف جدا ومرتب والناس كويسه جدا وكلهم كانو بيساعدوني ، ثانيا اتعاملوا معايا كحد كبير والغطسه كانت ٥٥ دقيقه مش ٣٠ دقيقه ولا ٤٠ دقيقه ولا ٢٠ دقيقه زي ما حصل معايا قبل كده خالص
انا اتبسطت معاهم جدا ورحت مكان اول مره اغطس فيه ، كمان سابوني براحتي خالص وكانو كل شويه يتطمنوا عليا ولما خلصت رجعت معاهم السنتر ونضفت العده بتاعتي وبدءو يسألوني ويعلموني حاجات ، حقيقي كنت حاسه ان انا في مكاني
بجد شكراً جدا لكل الناس هناك و انا ان شاء الله هغطس معاكم كتير و انصح اى حد عايز يستمتع بالغطس فعلا يروح المركز دا❤️

أنا سافرت رحلات غطس كتير جوه مصر، أبدًا ماشوفتش تنظيم بالشكل ده و اهتمام بكل التفاصيل الصغيرة قبل الكبيرة.
كانت اول مرة اشوف رحلة بحرية لطابا طالعة من دهب او من اي مكان بصراحة ما سمعتش عن رحلات غطس في طابا قبل كده، سافرت مخصوص من القاهرة لدهب عشان اطلع معاهم الرحلة دي و بجد من استمتاعي بالرحلة نسيت إرهاق السفر والتعب.
بعد ما ظبطت عدتي اليوم السابق للرحلة
وصلت الصبح بدري لاقيت كل حاجة متجهزة صناديق العدة كلها مرصوصة بتنظيم جنب بعض وكل صندوق محطوط عليه ورقة فيها اسم الغطاس واضح جدًا و الدولة اللي هو منها
ودي كانت حركة جديدة اول مرة اشوفها و رغم بساطتها لكن بسببها فكرة لخبطة العدد اتمحت تمامًا و سهلت جدًا تعارف الغطاسين ببعض.
الميكروباصات اللي هتنقلنا لطابا كانت ممتازة و مريحة جدًا كل ميكروباص فيه ٨ أشخاص فقط، المركب كانت لطيفة و الطاقم اللي عليها تعاملهم جميل و متعاونين جدًا.
ال briefings كانت سهلة وواضحة جدًا و تنفيذ الغطسات كان عالمي
الكائنات البحرية اللي شوفناها كتير جدًا و متنوعة ومش ممكن انسى ان اكبر سلحفاة بحرية شوفتها في غطس كانت هناك ضخمة جدًا ماشاءالله.
الأكل كان نضيف و جميل المدربين عالميين و تعاملهم جميل و بياخدوا بالهم من كل اللي في الرحلة بشكل شخصي يحسسك انهم اخواتك وأصدقائك
و العشا البدوي كان تحفة وختامها مسك فعلًا
و أكيد كل رحلاتي و غطسي معاهم من هنا و رايح