الفندق جميل جدا ونضيف في كل شئ استاف مؤهل للتعامل تحت ضغط وفي قمة الذوق النضافة مستمرة بشكل يومي للغرف والجاردن والمطعم وحمامات السباحة الاكل متنوع ولذيذ جدا فريق الانيميشن هايل وكل يوم بليل حفلة غير التانية في المجمل التجربة كانت رائعة وكلنا اتبسطنا جدا

انا طلعت 5 ليالي 6 أيام مع عيلتي وهلخص الموضوع كله في نقط ايجابيات وسلبيات:
الايجابيات:-
1- النظافه هي رقم واحد في الفندق سواء كان نظافة الغرف نفسها او حمامات السباحه او المطعم باستثناء حمامات اللي في ال lobby مكنتش نضيفه مع ان ده جزء منه يتحمله عدم حفاظ ال guests علي نضافة الحمامات للاسف لان العامل كان بينضف الحمام كل 10 دقايق.
2- الفندق واسع جدا وعلي مساحه كبيره فيه 4 حمامات سباحه 3 منهم للكبار وفيه واحظ منهم فيه اكوا بارك صغيره كده معقوله مش وحشه للكبار والصغيرين وفي حمام سباحه تاني الاطفال فيه اكوا بارك للاطفال.
3- ال animation team كويسين جدا وفي كل يوم بليل show بيتعمل بفقرات متنوعه.

السلبيات:-
1- الاكل مستواه اقل من المتوسط ، مفيش تنوع بالشكل المطلوب خصوصا بين الغداء والعشاء كان في اصناف معينه ثابته مبتتغيرش غير ان في بعض الاصناف بصراحه كانت متتاكلش لجودتها السيئه.
2- الشاطئ صخري وفي جزء صغير رملي بتنزله عن طريق سلم نازل من المارينا الخشب الخاصه بالفندق لكن المشكله الاكبر ان الشاطئ مفيهوش عمق خالص غير بعد مسافه معينه كبيره لازم تمشيها لان السلم اللي بينزل في الجزء الرملي اللي فيه عمق مقفول عشان مكسور.
3- معاملة الستاف بشكل عام كويسه جدا وتقريبا دي الحاجه اللي مخليه الفندق ده واقف علي رجليه لكن للاسف كان في بعض الشيفات كان معاملتهم مش علي قدر المسئوليه خالص خصوصا في وجود الاجانب.
4- البوفيه مساحته صغيره وده كان سبب دائم فب زحمه وطوابير علي البوفيه والشيفات هما اللي بيحطوا الكميات باستثناء اصناف معينه ممكن انت تحطها بنفسك.
5- الدخله للفندق صعبه ورخمه شويه خصوصا علي الباصات الكبيره.

يعني بشكل عام مقدرش اقول انها تجربه سئيه او كان وقت وحش كانت تجربه كويسه وقضينا وقت كويس لكن بصراحه مش هكرره تاني وهفضل اني اروح فندق تاني افضل لكن يظل هو مناسب جدا بالنسبه لسعره.

المكان كفندق لطيف و كويس لكن بالنسبه لحد راح فنادق كتير مش هيقتنع بيه الشاطئ صخرى كله و مينفعش للنزول و فيه اربع حمامات سباحه و اكوا بارك صغيره جدا و فيه زرع كتير و الاوض معقولة اما بالنسبه للستاف ف الواحد مش عارف يشكر فيهم ولا يزم فيهم لان من ناحيه هما ضغط الشغل عليهم كتير و من ناحيه كتير منهم طريقة معاملتهم مش حلوة مع المصريين و بالمناسبة الفندق قائم بشكل اساسى على المصريين عن طريق شركات السياحة ولو البار مان او اى عامل ف الفندق شاف اجنبى و انت بتتكلم معاه هيسيبك و يطنشك و يروح للاجنبى ولا كأنك موجود و معظم اللى شغالين من الصعيد و معظم الناس الجيست المصريين نفس الكلام و اعتقد ناس كتير اوى من اللى بتنزل الفندق ده مدخلتش فنادق قبل كده لان مفيش اى محافظة على نظافة الفندق و الحمامات خصوصا ده غير ان مفيش نظام و دور لما تدخل تاخد الاكل من البوفيه ممكن تلاقى واحد جه وقف قدامك بكل بجاحة و المطبخ عموما حوار تانى الفندق موقف على كل صنف شيف هو اللى بيحطلك الاكل و ده اول مرة اقابله ف فندق بصراحة الاوبن بوفيه انت بتاخد اللى انت عايزه بايدك محدش يحطلك و يقولك كفاية كده او بزيادة و بالتالى دى طريقة سيئة جدا من الفندق و الاكل مفيهوش تنوع كبير الاصناف شبة متكرره و الطعم بيختلف فيه حاجات طعمها بيبقى حلو بس فيه حاجات تانيه كتير طعمها مش اد كده و حصل موقف قدامى ان جيست مسك المعلقة و بيحط لنفسه فاكهه الشيف كان ناقص يزعقله بمعنى الكلمه وهو بيقوله سيب المعلقة انا هاجى احطلك ده بالنسبة للمطبخ اما بالنسبه للنظافة العامه ف الفندق نضيف و الناس بتنضف باستمرار بس هو فيه ابراص كتير و ساعات بتدخل الغرف و من الحاجات السيئة بردو ف الفندق ان عند المغادرة بيجى يقصلك الاسورة عشان متاخدش حاجة من المطعم او البار مع ان الاتوبيس بتاعك لسه موصلش و انت قاعد عندهم لسه و ده على عكس اللى قابلته ف فندق زى مارلين ان كنت خلاص مغادر و الاتوبيس اتأخر و جالنا حد من الفندق قالنا اتفضلو ادخلو معاد الغدا جه قولناله احنا خلاص مغادرين قال مفيش مشكله و ايه يعنى حضرتك نزيل الفندق و طبعا هنا يوضح الفرق الكبير ف المعامله بين الفندقين و حاجة كمان و انا ف الفندق طلبت اوبر عشان اروح المارينا و معايا والدتى ست كبيرة الامن مرضيش يخلى اوبر يدخلى و مشيت بوالدتى ممر طويل وهى مش قادرة تمشى و بقوله ليه مدخلتوش يقولى كلم الرسيبشن و لقيت الامن بتاع الفندق بيزعق معايا
من الاخر ف المجمل لو انت حد اول مرة تنزل ف فندق روح الفندق ده هو معقول و هتنبسط فيه و كمان رخيص اما لو انت من صغرك بتنزل ف فنادق ف نصيحة متنزلش ف الفندق ده حتى لو ممعكش تدفع اكتر ف متسافرش احسن عشان الاشكال اللى هتشوفها هناك و طريقة المعامله مش هتعجبك و الكومنت ده انا هكتبه ف كذا مكان