لا أجد العبارة المناسبة لنصحكم لتجنب الإقامة في هذا الفندق الملخص أن الفندق له وجه آخر في الصيف بيقلل التكليف
لقد زرت هذا المكان في الشتاء الماضي وكان جيد جدا في جميع النواحي
لكن فالصيف ذهب إليه وانا سعيد استخدمت الابليكيشن وقمت بالحجز مع الاستاذ كريم حجز مسبق وقبل وصولي بثلاث ساعات استخدمت خاصية تسجيل الوصول عبر الإنترنت و معرفة المكان والمتابعة لأن ذهبت بسيارة الشخصية
ولاسف لم يتصل بي أحد لارشادي
وعندما دخلت الفندق لم أجد أي استعداد ولم تكن الغرفة جاهزه وبكل بسرور من ذو الأبتسامة الجميلة الاستاذ حازم الخلوق مسؤول الرسيبشن اننا نتوجه لتناول الغذاء قبل إنتهاء المدة المخصصة له وسوف تكون الغرفة جاهزه وعدنا إليه مره آخر ولم تكن الغرفة جاهزة تصرف حازم بذكاء ومهنية وقال لي انا اعتذر لك عن التأخير وتم ترقية الغرفة بدلا من عادية إلى فاميلي وكان ذلك لطيف منه الصدمة كلها تتلخص في الطعام والشراب اتفق مدير الفندق مع مدير المطعم بتخفيض المنتجات لأن معظم الزبائن محلين اي مصرين (بصورة محزن )
اولا الطعام لم نجد به تغير البرجر لحمه أو فراخ يومين فالغذاء و الغريب أن الفندق ينتمي لشركة اكور المعروف التي تتضمن أشهر البرندات مثل السوفتيل والحلويات دون المستوى والمفاجاة فالسناك
بدلا من آيس كريم تابع لشركة معروفة (نسله) إلى آيس كريم بودرة مثلج
وبدلا من البيتزا مثلثات إلى مكعبات وبدلا من الهودوج المعروفة إلى مقسوم نصفين

ادارة بخيلة وأوتيل ليس على مستوى الاسم والقيمة المقدمة أقل بكثير من المال المطلوب زيارة هي الأسوأ ولا انصح به ولن تتكرر

البداية كانت ليست جيدة فقد قام فرد الأمن على بوابة الدخول بإفتعال مشكلة مع سائق التاكسي واللي مااعرفش الحقيقة ماهي المشكلة من كتر زعيق فرد الأمن وصوته العالي مع السائق واللي على ما اظن ممكن تكون الرخصة منتهية ماهعوش رخصة ايأ كان انا مش هوقف كل سواق تاكسي واقول له وريني رخصتك سارية ولا منتهية !!! وللعلم كتير من سائقي التاكسي في الغردقة عندهم مشاكل في التراخيص والمعظم عارف كده والذي بعدها فرد الأمن الذي اقل ما يقال فيه أنه تعامل بكل قلة ذوق وعدم احترام للجيست حيث قال باللفظ ( طيب اركنلي على جنب ومافيش حد هيدخل ) !! واني المفروض مني اني أتصرف وانزل الشنطة وامشي بيها مسافة تقريبا كيلو لغاية مدخل الاوتيل !!! وانا بصراحة كنت ملتزم بأقصى درجات ضبط النفس حتى قبل هذه الجملة التي اضطرتني إني انزل من العربية وأطلب من فرد الأمن أنه يطلب حد من الإدارة للتفاهم معاه لأنه بصراحة تعدى كل حدود عدم اللباقة والاحترام وتطاول على السائق وكان الموضوع سيتطور الى خناقة وتراشق بالالفاظ لولا تدخل مشرف الأمن أستاذ أحمد لملوم ( والذي اقدم له شكري واحترامي على تعامله السريع مع الموقف ) اللي تواجد بصراحة في الوقت المناسب وقام بالاعتذار لي والسائق وسمح لنا بالدخول على الفور وكنت فعلا من الوقف ده داخل وعامل حسابي اني ألغي الحجز لولا تدخل المحترم والخلوق مستر حازم في الريسيبشن واللي امتص غضبي واعتذرلي وتقديرا له ولإحترامه قبلت بالاستمرار بالحجز وقام بصراحة بلفتة ظريفة منه أنه قام بعمل تعلية للغرفة لتكون سي ڤيو بدلا من استاندرد ولاقيت أن الموقف وصل لكثير من العاملين وفي كل مكان الناس كانت بتعتذرلي على الموقف البايخ اللي حصل واللي عرفته بعد كده أن الشخص ده صدر منه أكثر من موقف بنفس الطريقة بعدم التعامل المحترم مع الجيسيتس والغريب أن الإدارة بعد ده كله لسه بتخليه في أول مكان يتم فيه التعامل مع العملاء !!!! وحتى وانا خارج من الاوتيل لاقيته لسه موجود على البوابة !!!!

بأقدم الشكر كمان للبيل مان عم مصطفى المحترم والبشوش واللي الابتسامة لا تفارقه كمان بشكر السي جارد الاخ عبد الناصر
المميزات :

الشاطيء الرملي وتصميم الاوتيل الكلاسيكي واللون الأبيض مع لون السماء الزرقاء ولون الخضرة يبعث على الهدوء وراحة العين والاعصاب تصميم وديكور الغرف الجيد

السلبيات :

１- الاوتيل غير مؤهل لاستقبال الأعداد الكبيرة من الجيسيتس الاوتيل كان تقريبا زي ماعرفت أنه بنسبة اشغال 95%
２- نظرا لنسبة الاشغال العالية أصبح في عجز في الشيزلونجات اللي على حمام السباحة الرئيسي والبحر واضطرت الناس تفرد الفوط بتاعتها وتحط حاجاتها على كراسي البار بتاع حمام السباحة !!! دون أية مبالاة من القائمين على إدارة الاوتيل لأيجاد حلول
３- ايضا عجز في كراسي المطعم مما اضطر الناس تاخد الاطباق وتطلع بيها بره المطعم وتقعد على كراسي البار وتفضل طالع داخل !! بل وصل العجز كمان للأطباق والمعالق اللي بتلاقي مرة واحدة اختفت واقعدلك بتاع عشر دقائق لغاية لما يرجعوا يحطوها تاني تقريبا بيستنوا الناس تخلص أكل وبعدين يرفعوا الأطباق ويغسلوها ويجيبوها !!!
４- الغرف حماماتها ضيقة جدا وبانيو الاستحمام يادوبك متر في متر !! لشخص واحد فقط !!! ( مرفق بالصور ) وكمان الفوط اللي المفروض جديدة غير نظيفة وعليها بقع !!! ( مرفق بالصور )
５- تخيل لما تبقى رايح مكان براند وما تلاقيش كاتيل ولا شاي ولا سكر في الغرفة !! ولو عايز اكسترا تشارج !!
6- لأ مش بس كده ده كمان غير متوفر أية نوع من انواع الأعشاب ( ينسون نعناع كركديه قرفه .... ) في أية بار ولا حتى في بوفيهات الوجبات الرئيسية !!!! ياراجل ده لو اوتيل ٣ نجوم ولا اربع نجوم ومش براند هيوفرها !!!!
７- مش بس كده لأ ده كمان جايين ماكينة القهوة من ( بونجورنو ) !!!! ياراجل بقى في اوتيل براند يعمل كده ؟!! ده اوتيلات ال ٣ وال ٤ نجوم بيبقوا جايبين مكن نيسكافيه !! لأ وكمان المكن لا فيه كابوتشينو ولا حتى نسكافيه ولا هوت شوكليت !!! يعني عشان تشرب نسكافيه لازم تدوس على القهوة وبعدين تحط عليها لبن ؟!!! شيء عقيم من اوتيل براند !!! ８- الأوتيل بيمن على الجيست بزجاجة مياه صغيرة يوميا فقط لاغير ولو طلبت تاني بفلوس !!( ده لو بيبي هيشرب اكتر من كده ) !! ومطلوب منك انك تفضل ماشي بيها عشان قبل ما ترجع الغرفة تملاها من اي بار !! عشان تلاقي مياه تشربها في الغرفة !! هو في كده ؟!! احنا جايين نستجم ولا تتعذب ؟!!
９- العصائر حدث ولا حرج نوع واحد اللي موجود ( برتقال او اناناس ) من اردأ الأنواع ومعاه كركديه !! بس هو لفته الكركديه ده فعلا الاوتيل عنده حق فيها عشان يقلل الضغط اللي بيترفع عند الجيست كل لما يتصدم بنكسة جديدة !!!
１０- المطعم وده بقى الطامة الكبرى بتاعت الاوتيل
الفطار : تخيل لما يبقى اوتيل براند وأربع نجوم ويبقى الفطار فيه نوع واحد جبنه بيضاء !! جبنه بيضاء فيتا ساده فقط !!! ونوعين جبنة مطبوخة انواع ليست جيدة !!! وحدث ولا حرج على طابور تحضير طبق البيض ممكن تفضل واقف عشر دقائق عشان ربنا يكرمك بطبق بيض !!!

الغذاء : تخيل انك تبقى في اوتيل براند ويكون الطبق الرئيسي للفراخ في المطعم الرئيسي هو عبارة عن برجر فراخ مصنع ونوه مجهول الهويه ؟!! ده يتسمى ايه ؟!! ده مالهوش أي مسمى غير عدم احترام للجيست اللي دافع مبلغ كبير في اوتيل براند ومتوقع منه أنه يحترمه ويقدره ويلاقي الرد بالشكل ده !!! بوفيه فقير من ناحية الأصناف والتنوع والطعم بخل في كل شيء

العشاء : كالعادة بوفيه فقير من ناحية الأصناف والجودة والتنوع والطعم يادوبك هم الثلاث أطباق الرئيسية فراخ لحم سمك دون أية إضافات جانبية أو مقبلات !!! في الاوتيلات المحترمة 4 نجوم اللي مش براند بتكون الثلاث أطباق الرئيسية متوفرة وبجانبها على الأقل صنفين تانيين ( شاورما كبده لحمة باردة نوع تاني فراخ سمك مشوي ) افكار ثانية من أوتيلات بتقدر وتحترم الجيسيتس بتنوعها ده بالإضافة لأنواع سناكس تانية زي سمبوسك كبيبة أو أو !!!

السناكس : موجود فقط على بار حمام السباحة وهو متكرر ومافيش غيرهم ( بيتزا مارجريتا !! اومال يعني هنحطلك نوع لحوم مثلا او مشروم او خضار لا سمح الله ) ليه يعني هو انت جاي اوتيل محترم ؟!! ومعاها البرجر المجهول الهوية وشوية بطاطس وشكرا على كده اه وكمان الايس كريم اللي مالهوش أي طعم !!!
11-الشو الليلي فقرة واحدة فقط وحتى الرقاصة اللي جايبنها شبه نعيمة الصغير !!! ( مرفق بالصور ) ده حتى نعيمه الصغير فيها أنوثة عنها !!!!
12- الناموس والحشرات الزاحفة الاوتيل غير مهتم بأعمال مكافحة الحشرات حتى أن الغرفة كانت فيها ناموس وكمان لاقيت برص كبير( ابو بريص ) في التراس!!! ( مرفق بالصور )

الخلاصة عيب قوي لما تكون اوتيل براند وليك اسم وسمعة والجيست جايلك مخصوص لأنه متأكد انك هتقدره وتحترمه ويكون ده ردك !!!

من خلال زياراتي للغردقة لمدة عشر سنوات وبما اني زرت اوتيلات تانية براندات زي موڤنبيك وهيلتون وكانت للاسف بنفس الوضع دلوقتي عرفت ليه معظم الأوتيلات البراند بتكون 4 نجوم فقط !! أوضح أن الاوتيلات البراندات بتعتمد على الاسم في الترويج وجذب الجيستس دون تقديم خدمة تناسب الاسم أو المبلغ المدفوع في حين العكس موجود في بعض الاوتيلات الأخرى اللي مش براندز اللي بتحاول تثبت نفسها بتقديمها خدمات جيدة لإرضاء الجيستس وتقديره واحترامه

هي زيارة لن تتكرر ولن انصح به أحد