ريفيو عن long beach resort
وصلنا يوم السبت ١٠/٢ و غادرنا يوم الاربعاء ١٠/٦، وصلنا الساعة ١ وعملنا check in وقالولنا عقبال م نخلص غداء الغرف هتبقي جهزت وكنا حاجزين غرفتين واحدة سريرين لوالدتي واختي وواحدة فيها سرير كبير وسرير صغير ليا انا وزوجي وولادي الاتنين وطلبنا الغرفتين يكونوا جنب بعض ويكونوا قريبين من المطعم وال pool.. فضلنا منتظرين لحد ٣ الا ربع عقبال م الغرف جهزت وروحنا مع الموظف للأوض اللي اكتشفنا انها بعيدة جدااا عن أي حاجة ف مبني ٦٥ وكمان غرفة واحدة اللي كانت جاهزة والتانية لسة هتتنضف ومكانوش جنب بعض واحدة كانت ف الارضي والتانية كانت ف الاول وقلنا ماشي.. الغرفة الاولي كان الدولاب فيها مكسور والثلاجة بايظة كلمنا ال reception عشان ييجوا يصلحوها وكل ده والغرفة التانية لسة م اتنضفتش واكتشفنا اننا بعاد جدااا عن اي حاجة ف الفندق والفندق اصلا levels وكبير جدااا ومعايا والدتي مش هتقدر كل شوية تطلع وتنزل.. روحنا انا و زوجي ع الريسبشن عشان يشوفوا لينا غرف تلنية والاجابة مفيش.. طب استنوا لبكرة وقولنالهم اصلا الغرفة التلنية مجهزتش لما طلعنا نشوفها اصلا لقينا فيها ٣ سراير عرض ١ م مش غرفة عائلية بالمرة.. المهم بعد انتظار ساعة وربع قابولنا فيه غرفتطن جاهزين ف مبني العائلات وبعتوا معانا حد يوريهالنا... الغرف طلعت ضيقة جدااااا ونظام برده سريرين منفصلين عرش ١ م اللي هو الباقي ينام ع الارض مثلا ف طبعا معجبتناش ف قالولنا انتظروا لبكرة نجهز غرف افضل كنا وصلنا للساعة ٥ وضيعوا علينا اليوم واستسلمنا أصلا انهم يعملوا حاجة... وجه حد صلح الدولاب عند والدتي وكان المفروض هيغيروا الثلاجة الفني راح معرفش عمل فيها ايه وقال هي كدة اشتغلت واصلا هي المفروض يبقي تبريدها منخغض كاننا مدخلناش فنادق قبل كدة وعارفين الميني بار تبريدها ازاي.
طبعا بدأنا من تاني يوم نروح ال pools ونكتشف ان عربيات التنقل اللي المفروض عربية كل ١٠ دقايق بنستناها بالنص ساعة لان تقريبا هما عربيتين بس اللي شغالين ف الفندق.
حصل كمان موقف ان احنا حاجزين ٤ ليالي all inclusive فوجئنا ان ثالث يوم راجعين من ال pool ع الساعة ١٢ لقينا المفتاح مش راضي يفتح الغرفة ولحسن الحظ مفتاح غرفة والدتي كان شغال المهم زوجي اتصل بالريسيبشن محدش بيرد. راح ع الريسيبشن لقاهم بيقولوله ال check out بتاح حضرتك النهاردة بالرغم اننا حاجزين ٤ ليالي وكمان ف كاتبين كدة ف introduction form اول م وصلنا.. المهم كلمنا الشركة اللي حاجزين تبعها وجه موظف منها كان ف الفندق مع فوج وقال ايه الفندق مدون ال check out date غلط عشان كل الفوج اللي طالع ف الوقت ده ٣ ليالي فقط وافترضوا ان احنا كمان كدة واسفين... اللي هو لولا ستر ربنا كان كمان غرفة والدتي مش هتفتح وفعلا حاولنا نستعمل مفتاحها تاني مفتحش عشان عاملين المغنطة ٣ ايام بس.. وال room service مكنش نضف طبعا لا الغرفةدي ولا دي بعيدااا ان اصلا كل يوم كنا بنرجع الغرفة بعد الظهر مكانش بيبقي نظفها والموظف ده قعد يقولنا ده انا عليا كل يوم انظف ٤٠ غزفة وكتيير عليا وواضح ان عندها مشكلة ف عدد العمالة عموما... طبعا ضربوولنا المزاج والاستمتاع بالنار وكنا بنفكر نحجز نمد ليلة كمان او نعمل late check out قفلونا منهم اصلا.
الغرف
قديمة نوعا ما ومتهالكة شوية والخزنة عندي كانت بايظة اصلا وموضوع ان السرير عرضة ١ م ده غريب الصراحة.
الاكل
متنوع أكيد كان فيه فراخ محشية وبط وفراخ مشوية وكفته وبرجر ولحمة rosted وكاليماري وسمك بوري صينية وفيليه بس قسم المكرونة واقع جدااااا وطعمه حلو جداا ف حاجات وحاجات تانية مش اد كدة وكان فيه شيف جديد ع قسم الاومليت كان بيعمله ني... اللبن اللي موجود للمشروبات تقريبا بودرة ومتخفف بمياة كتييير.. قسم الحلويات كان جميل.. مطعم الشاطى كان بيعمل سندوتشات كبدة بشعة َبطاطس محروقة وبيتزا مش اد كدة.
الشاطئ وال pools
حمامات سباحة كتيير بس تنضيفها مش الحسن حاجة وكان فيه جذر رهيب للبحر بس مش كل يوم.
الجيم
ع الشاطئ حلو جدااا وكان فيه kids area برده كويسة جدااا ع البحر ومرجيحة جميلة للتصوير والمارينا تحفة والجو كان حلو جدااا الاسبوع إللي فات.
انا مكنتش هكتب reviews بس لقيت حد بيشكر جدااا ف الفندق وحبيت ان اللي هيروح الفندق يبقي عارف ذي م فيه تجارب كويسة يه برده تجارب مش اد كدة َكل واحد ليه حرية الاختيار... كنا مسافرين الليلة ب ١٥٠٠
ممكن يكون قيمة قصاد سعر تمام وجايز يكون رنج السعر ده بيبقي نفس الخدمة ف الفنادق... دي ثالت مرة اروح فيها الغردقة وهي عموما مكان جميل جداااا وروحنا الاكواريوم اخيرااا المرة دي وفعلا ممتعة وانصح كل الناس تروحها والاطفال هينبسطوا بيها جدااااا... ذي م قولت الفندق كبييير جداا وم انصحض بيه حد هيسافر بوالده او والدته لان موضوع السلالم والمنحدرات ده هو اللي الفندق قائم عليه ومرهق جداااا.

من افضل الفنادق في البحر الاحمر يقع الفندق علي ضفاف البحر الاحمر مباشرة مما يجعلك تشعر بالراحة والاسترخاء التام خلال فترة الاقامة
خدمة المطاعم ممتازة جدا والغرف
وخدمة المشروبات والبارات التي تقع علي الشاطى خدمة ممتازة جدا شكرا فريق عمل الأغذية والمشروبات شكرا رضا العربي علي حسن كرم الضيافة

‎فندق لونج بيتش جميل جداا و خدمه ممتازه
‎و البول نضيف و امن و ناس ذوق بالاخص لايف جارد اسامه
‎و الاكل متنوع و مهتمين جدا بالنظافه و تعامل جميل بالاخص الويتر هيثم و مصطفي
‎و خدمه الغرف جميله و شغلهم ممتاز بالاخص محمود