منذ وصولنا للاستقبال وكل شىء سىء وخصوصا معاملة الاستقبال. معى طفلين دون الست سنوات وعندما طلبت سرير لهم ليناموا عليه وبعد معاناه رفضوا وقالوا انت مش دافع لهم لانهم اطفال . المسبح صغير و غير نظيف بالمره. منطقة اطفال ولكنها فارغة من الالعاب.موظفين ولكنهم غير مدربين بالمرة ولا يعرفون شيئا عن الخدمه. الاكل سىء . لا انصح به بالمرة . لا يوجد نت ابدا وكلما سالنا جميع الموضفين عن النت اخبرونا انه فاصل ولا يعمل , والبعض يقول انهم لا يعرفون كلمه المرور , شىء غريب جدا

المكان سيء جدا جدا ..لا يوجد اهتمام بالعملاء تم تأخير ف استلام الغرف بدل من الساعة 2ظ إلى الساعة 6 المغرب دون أى تعويض من الفندق ...
الأكل سيء جدا جدا
عدم الاهتمام برأي العملاء ولا راحتهم ..
المكان نظيف ديه الحاجة الوحيده الجيده ف المكان..
لا أنصح به

1- النظافة ممتازة العمال شعلة من النشاط حمام السباحة نظيف جدا والغرفة عندما تطلب تنظيفها تجدها نظيفة يتم وضع سرير للأطفال زيادة بدون طلب ستجده لاحقا فى الغرفة - الغرفة بها مينى بار ( تلاجة) بها ازازتين مياه معدنية يتم اضافة المزيد عند تنظيف الغرفة ولو فى طفل هيكونوا 3 ازايز - يوجد خزينة فى الغرفة تجدها مفتوحة اول مرة اضغط على حرف c وادخل الرقم السرى من 4 ارقام ثم اغلق الخزنة وكده تمام - يوجد مجفف هواء فى الحمام - ومياه ساخنة فى الدش طول اليوم - وصابون سائب على الحوض والدش - وباب للشاور يمكن غلقها - التكييف فى الغرفة ممكن تتحكم فى درجة تبريده
2- عند استلام المفاتيح تستلم لكل فرد بالغ كارت تستلم بيه البشاكير الخاصة بحمام السباحة او الشاطئ عند الحاجة وبتستلم الكروت تانى لما ترجع البشاكير فى اخر النهار – مكان استلام بشاكير حمام السباحة مختلف عن مكان استلام بشاكير الشاطئ – وعند ضياع الكارت يتم دفع مبلغ 15 دولار وده سلبية ولكن يجب المحافظة على البشاكير والكروت
3- يوجد حمامين سباحة فى المنتجع واحد بجوار المطعم الرئيسى والاخر بجوار مسرح الترفيه فى الناحية الاخرى من الفندق – ويمكنك تصوير خارطة تصميم الفندق فى الاستقبال لتسهيل الامر عليك – الحمامات نظيفة جدا ويوجد فريق انقاذمن فردين او 3 متواجدين دائما بجوار حمام السباحة – يمكن النزول بالبوركينى او المايوه الشرعى فى هذا المنتجع عادى جدا – لا يوجد فرق فى المعاملة بين المصرى والاجنبى على الاطلاق والعاملين فى المنتجع قمة فى الزوق والاحترام وبسهولة تحصل على المعلومة والخدمة – حمام السباحة والشاطئ يبدأ من شروق الشمس حتى غروبها الساعة 6 مساءا – يوجد اكوا بارك فى حمام السباحة بجوار مسرح الترفيه
4- يوجد 4 أماكن تحصل منهم على المشروبات مثل عصائر فروتى ( انانس – تفاح – برتقال – جوافة ) وكولا وسفن وشاى وقهوة براحتك من الساعة 10 ص ل 5 م ومن 6 ونص م لحد 12 منتصف الليل – الاماكن على الشاطئ وبين حمام السباحة والشاطئ وبجوار مسرح الترفية بجوار حمام الاكوا وبجوا الاستقبال فى الكافيه وقاعة الدسكو – الفشار بالليل غالى جدا ب 20 جنيه – ونفخ العوامة ب 10 جنيه والشخص المسؤل عنه جاف المعاملة وغير ودود على الاطلاق انفخها بنفسك احسن
5- بالنسبة للأكل الفطار ملكى 5 نجوم بيبدأمن الساعة 7 لحد 10 ص وفى كل اللى تتمناه فول صحيح وفول مهروس وبيض صحيح وبيض اومليت وانواع جبن تلاجة ورومى وقريش وغيرها ولانشون لحمة وفراخ وسلطات انواع واشكال ورز بلبن وشعرية وكل انواع المخبوزات والعيش وزبادى سادة وفروالة وغيرها
6- بالنسبة للغداء بيبدأمن 12 ونص م ويخلص 3 ونص م وهو متوسط المستوى مش زى الفطار بيكون رز وبطاطس ونوع من اللحوم زى كفته او كرات لحم او كباب حلة والفراخ بتاعهم سيئ جدا حتت صغيره بس شاورمة الفراخ حلوة وفى اكل تانى كتير اوبن بوفيه تنقى براحتك – وحلويات انواع واشكال والفواكه تفاح وبرتقال متقطعين وفى كانتلوب وبطيخ بيقطعملك الشيف – بسلة وفاصوليا خضراء – خضار سوتيه – مكرونة سباجتى وبشاميل - الكل فى المطعم الرئيسى الكبير افضل من المطعم اللى بين حمام السباحة والشاطئ اللى هو فى كمان من الساعة 3 ل 4 فترة سناكس يوميا جربت يوم بطاطس مقلية – وفى ايام زى السبت والاربع والاثنين بيتزا –
7- العشاء نفس اصناف الغداء بيغيروا 3 او 4 اصناف – وفى سمك مقلى فى سمك جريلد – وفى ايس كريم براحتك فى العشا
وفى من 11 م لحد 12 م ممكن تروح المطعم هتلاقى مكرونة سباجتيى وصلصة وطحينة وحلويات لو جعت وفى كراسى للأطفال فى المطعم احيان ممكن تستنى نص دقيقة او دقيقة بره المطعم فى اوقات الذروة والزحمة
8- استلام الغرفة الساعة 2 م والتشيك اوت الساعة 12 ظهرا
9- الاستقبال ودود جدا وممكن تسأله اى حاجة قبل ما تروح الغرفة هيجاوبك .
10- فريق الانيميشن حلو برضه وبيعمل فقرات بالليل على المسرح للأطفال وعروض تانى زى عرض الليزر وعرض الراجل اللى ينام على الزجاج المتكسر اللى معجبنيش بصراحة لانه غير مناسب للاطفال .
كانت رحلة حلوة بس اتمنى يهتموا اكتر بالتنوع فى وجبة الغدا والعشاء .