لقد قمت بزياره الاوتيل في شهر ابريل و قد استمتعت كثيره بالقامه به لقد كانت الغرفه واسعه و نظيفه و قد كان الموظفون كتير ودودون بالاخص الاستاذ محمود بالستقبال و الذي استبدل لي الغرفه لتطل مباشره علي حمام السباحه و قد قام بمساعدتنا في الكثير من الاشياء بناء علي طلبها منه

السلام عليكم ورحمة الله وبركاته
لقد أقمت في اجنحة ازورا هي شقق فندقية كان الاستقبال جيد والنظافة متوسطة والإقامة هادئه أشكركم الشكر الجزيل وربما نعيد الإقامة مرة اخرى في هذه الأجنحة .. تقبلوا تحياتي ...

المنظر على بووكينج موحي انه مكان جميل جداً ومناسب لأسرة ! الحقيقة اني قضيت كابوس هناك من أول ما وصلت فضلت ساعتين قاعد في اللوبي والريسبشنست بيلعب بالتليفون ، لما فهمته اننا تعبانين ومحتاجين ندخل الغرفة لأن الساعة وصلت 3 واحنا واصلين من 1 ، قاللي طيب وطلع نادا السيكوريتي يودينا لأن البيل بوي كان بيوصل ناس تانيين وقالي الشنط هتلحقكم ، جه السيكوريتي فضل يلف بينا في الشمس وميعرفش الشالية فين ! ( ساعة ومعايا مراتي حامل وامي سنها كبير !! ) في الاخر ميعرفش فين المكان وراح جاب زميلة اللي سبحان الله بردو معرفش، المهم كلمت بتاع الريسبشن بعتلي البيل بوي بعدها ب 10 دقايق ووصلنا الشالية نلاقيه بيعوم لأن في ماسورة مكسورة( عندي صور وفيديو ) المهم احنا اسفين يا افندم وهنغيرلك الاوضة ( الساعة داخلة على 4 واحنا تعبانين ) وروني مكانين تانيين ، أول مكان كان بردو الشاور مكسور وبيسرب مياة !! قلتلهم معندكوش سباك ! هاتولي المدير يشوف المهزلة دي ( مشفتش المدير لحد ما سافرت ) ، قالولي طيب معلش شوف غرفة تالتة لقيت غرفة قذرة جدا جدا مينفعش انسان يقعد فيها ويقولي بس هننضفهالك ادينا ساعة زمن !! قلتله لأ طبعاً مينفعش ! الحل اني اشوف فندق تاني ! بس مفيش لا شبكة تليفون علشان اتصل او ادخل عالنت ( شرطة واحدة بالكتير ) ومفيش واي فاي !
طبعا انتظرت اول مكان لأنه كان الوحيد المناسب بعد ما وعدوني يصلحوا التسريب بعدها بساعة صلحوا التسريب ، رحت لقيت كل السراير غرقانه ومغيروش الغطيان !
كانت وصلت الساعة 5 ومرهقين من اللف في الشمس والطيران ،
الغرفة مفيهاش اي شئ شغال التكيفات 3 ، فيهم واحد بس شغال !
الخزنة مش شغالة
نور الحمام مش شغال
الكراسي فيها كرسيين مكسورين
الاحواض شبه مسدودة بتصرف ببطء
النور قطع علينا تاني يوم علشان طلع الكهرباء بعداد بيتشحن بكروت !!!
مفيش مدير طوال ال 5 ايام رضا يقابلني
الشاطئ اللي كاتبين على بعد 5 دقايق على بعد 45 دقيقة لو هتمشي في الصحرا و 10 دقايق بالعربية !!
المكان فيو رائع ومكان جميل لكن مفيش ادارة
ممكن اكتب كمان 10 صفحات عن كمية الحاجات اللي قابلتنا هناك ! مع العلم لحد خامس يوم المياه كانت بتسرب ومحدش صلحها بعد ما لزقوها اول يوم وكل يوم كنت بقول للروم سيرفيس يقولي يا افندم ده حد استعمل الحمام مش تسريب ، لحد رابع يوم صحينا بنعوم في المياة !!!
في الاخر ارضاءا ليه ادوني 8% خصم ( حوالي 400 جنيه ! )
ممكن احكيلكم اكتر عن سوء الاكل وسوء المعاملة وحاجات كتير لأن والله 5 ايام جحيم ! قال 4 نجوم قال !