من اجمل الاماكن التي زرتها بالغردقة وانصح به لقضاء وقت ممتع بة ويتميز بالمساحات الخضراء ومرافق خدمة مممتازة واود ان اتقدم بجزيل الشكر والعرفان للشيف (طاهر --مساعد مدير مطبخ ) على تعاونة معنا وتلبية كل احتياجتنا بكل صدر رحب وسرور فهو سبب لزيارتنا لهذا المكان الرائع مرة اخرى واشكرة لحسن استقبالة وجميع العاملين معة

اول اقامة في desert rose بنصيحة من صديق، ماندمتش وكانت اقامة جميلة لمدة اربعة ليالي، العاملين معظمهم (ليس الجميع) ممتازين وفي نهاية تعليقي هاقول ليه. مبدئيا كل شئ منظم وكل اللي بتقابلهم من العاملين ودود و محترم وبيساعدك حتى لو مش وظيفته وده معتاد في القطاع ده (مفيش حاجة اسمها its not my job) اللوبي ممتاز. عملية الcheck in كانت سهلة، الوصول للغرفة بالجولف كار، او بعربيتك لو رايح سايق، الغرفة مؤثثة على مستوى الخمس نجوم لكن مشكلتها ان التأثيث نفسه قديم مش حديث بس ده مابيأثرش على جودة الاقامة، التواليت كويس الميني بار كويسة الدولاب والخزينة والبويلر والمشاريب الساخنة (شاي/نسكافه/ اعشاب) متوفرة (مفيش كريمر) ، العيب الوحيد في البلكونة / الشرفة: الارضية خشب والبلكونات قريبة جدا جدا من بعضها ومفيش فواصل بينها توفر الخصوصية كنت حاسس اننا والغرف المجاورة قاعدين مع بعض. حمامات السباحة ظريفة وخصوصا التالت في اتجاه البحر (Heated) وفيه two slides for the kids وآمن للآطفال وممكن استخدام الجزء العميق، بخلاف حمام آخر مخصص بالكامل للswimmers والاول (العام) ده اكبرهم وفيه بار جوه الحمام نفسه، ملاعب كرة قدم و تنس ظريفة، aqua معقولة مش كبيرة لكن مسلية والاطفال و الكبار بيحبوها جدا، البحر جزئين: الاول بحيرة امنة للنزول لجميع الاعمار ومقفولة بحيث مايوصلهاش موج فمفيش تجديد للميه ولونها مش صافي، والجزء التالي للكوبري (بيربط بين طرفين البحيرة) فيه شعاب وسمك خصوصا في المنطقة يمين الشاطئ ظريفة، فيه diving center, tattoo kiosk, camel riding, volleyball and small football fields, any many other activities interest the gusts. البارات موجودة في كل مكان ولو اقامتك all inclusive هاتلاقي المشروبات بجميع انواعها متوفرة و ف اوقات معينة بيقدموا للأطفال ايس كريم و كورن. المطعم الرئيسي جيد جدا مستوى الاكل بين الجيد و الجيد جدا وتنوعه جيد (((ملاحظة هامة هنا: انا مش هانتقد اوي قلة تنوع الاكل او جودته اللي بجد اعتبرتها جيدة جدا لسببين 1- النزيل المصري موجود وللأسف ثقافة استعمال الأكل واستهلاكه في الاوبن بوفيه عندنا لسه مش موجودة فأكل كتير بيترمي بدون الاستفادة منه، 2- كان واضح ان عمالة كتير بالذات في المطعم لسه تعيين جديد وماكنش عندهم التدريب او الوعي الكافي بثقافة الفنادق (كذا مرة لاحظت تصرفات ماشوفتهاش قبل كدة زي ان الترابيزات ماببتفرشش كما ينبغي او ان عامل يخبط فيك وحتى مايهتمش انه يعتذر) لكن تاني: كل ده مكانش ليه تأثير كبير واقتصر ده على منطقة المطعم الرئيسي، فيه مطاعم تانية: مكسيكي، لبناني ايطالي وسمك، النزيل صاحب الاقامة الكاملة متاح ليه الاكل مجانا في المطاعم دي (ما عدا الايطالي) كجزء من اقامته بشرط الحجز السابق قبلها بيوم، الanimation team بقى دول حكاية، بجد اروع حاجة في الفندق وبيتفننوا ازاي يخلوك مبسوط وبيعملوا مجهود رائع من اول اليوم لمنتصف الليل بنشاطات كتير سواء بالنهار او ع المسرح بالليل، للأسف محفظتش اسامي كتير بس كلهم في منتهى الاحترام والاحترافية، عمال الaqua، حمامات السباحة، الreception, الغرف ، الbeach وال bars كلهم ممتازين وفي منتهى الود، اتعاملت شخصيا مع مستر وليد الغنام وكان في منتهى الاحترام وساعدني جدا في كذا حاجة طلبتها وعمل اكتر من اللي طلبته، كمان اتعاملت مع موظف في الاستقبال اسمة مستر صامويل وساعدني كتير بكل تفاني، انا فعلا سعيد بالتجرية دي واولادي طلبوا ينزلوا في نفس المكان الاجازة القادمة.
الشئ الوحيد اللي ضايقني كان سببه احد موظفي الفندق في قسم الlost and found نسيت نظارة شمس على حمام السباحة واكتشفت الكلام ده تاني يوم، العادي والمعتاد في المواقف دي ان محدش من النزلاء بيلمس حاجة مش بتاعته وان احد العاملين بيلاقيها بعد غلق الحمامات وبيسلمها لمديره، سألت عامل حمام السباحة تاني يوم الصبح وحددتله مكانها فأكدلي انه لقاها وسلمها، المشكلة اني لما كلمت الموظف اللي بيستلمها ويحتفظ بيها اكدلي و اكد لمستر صامويل في الاستقبال وللoperator انها مش موجوده لأن البيه ماعملش شغله وماهتمش يشوف وظيفته كما ينبغي، لكن في النهاية النظارة رجعت بعد ما مستر احمد علي (مدير العامل اللي لقاها وسلمها) راح للاستقبال وفي الآخر اكتشفوا انها فعلا كانت موجودة في lost and found طبعا تصرف خاطئ وغير مسئول زي ده مايخلينيش اغير نظرتي للمكان ككل لكن تسبب في تعطيل مغادرتي ساعتين كاملين، ولولا تدخل مستر احمد علي ومستر وليد الغنام كانت نظارتي ضاعت، المهم ان كان فيه RECOVERY لغلطة الموظف ده وبرضه بشكرهم على الاقامة الجميلة

ان كنت تبحث عن مكان يجتمع فيه كل شيء ممتع لا تتردد في الذهاب لديزرت روز حيث تجتمع كل الاشياء الممتعه مع فريق انيمشن اقل ما يوصف به انهم نجوم فوق العاده بوكا ورميو وديفو واكثر من ٢٠ ولد وبنت انيمشن تيم اكثر من رائع تحياتي واجازتي كل سنه هناك بدون تفكير