بوابة ديزرت روز هي بوابة السعادة...هو بيتنا الثاني ومفيش كلام يوصف جمال المكان والوجوه الباسمة البشوشة اللي بتكون
باستقبالنا في كل مكان بالريزورت.. أصدقائنا وأخواتنا سعادتنا بتكمل برؤيتهم... مهما كانت الزحام مهما كان ضغط الشغل عليهم دايما المقابلة باحلى ابتسامه و افضل خدمة
شكرا لكل العاملين في ديزرت روز اللى بسببهم مبقناش نقدر نروح اى مكان تاني شكرا مستر محمد امين على حسن الادارة

للسنة الخامسة علي التوالي مازال منتجع Desert Roseاختيارى الاول. كل العاملون شعلة نشاط ومتعاونون لاقصى الدرجات رغم ارتفاع حرارة الجو تجد الجميع متفاني في عمله بلا اي كلل فالشكر واجب للكل بلا استثناء. واخص بالشكر والامتنان لدينامو النشاط والابتسامة الساحرة Mrs / ندى من guest relations على حسن معاملتها وتعاونها وتمنياتي بالتوفيق لها. و ا / احمد هجرس على توفير كل سبل الراحة في المطاعم بالرغم من ضغوط العمل وكثافة النزلاء. واخيرا صديقي العزيز ا / عماد عبدالمسيح علي حسن استقبالة وتعاونة الدائم.

ريفيو مفصل عن ديزرت روز ...
اولا و قبل اي شئ شركة السياحة اللي حاجزين معاها زي ما بيقول ا. شريف صادق تكون محل ثقة ..ازاى؟
قبل ما حضرتك تحجز معاها تكلم الأوتيل تتأكد ان الشركة دي بتتعامل معاهم دايركت مش عن طريق شركة تانية و تتأكد من السعر انا حجزت الأوضة الدبل سوبريور ب ٢٦٠٠ جم و طفلين فري اقل من ١٢ سنة.
الحمد لله احنا روحنا عن طريق شركة محترمة بس في ناس مع شركات تانية وصلت ملقتش حجز و ناس تاني كانوا pool view طلعوا جاردن و هكذا..
ثانيا المكان زحمة اووووي اوووي علشان خدماته حلوة اوي اوي .. و حضرتك دفعت ١٠٠٠٠ جم اقل حاجة فندق و مواصلات فعلشان تتبسط و تتجنب الزحمة هتصحي بدري ٧ او ٧:٣٠ تفطر بدري و تروح البحر أو البسين هتلاقي الدنيا فاضية و جميلة و تستمتع باليوم من اوله ..و الاكوا للولاد و الكبار كمان لطيفة و اللي واقفين هناك مخليين بالهم من كل حاجة
الغداء في علي البحر بيعملوا بوفيه مفتوح مش بكل الاصناف بس بالنسبة للناس اللي ملهاش في الغداء تمام اوي
و في سناكس برجر و بيتزا و سوسيس و فرايز و ايس كريم و بوب كورن للولاد اذا حبوا بدل الغداء.
العشاء تنزلوا ٧ او ٧ و ربع تتعشوا و تروحوا soda club في باند زي فرقة وسط البلد كده حلو اوي
و في المسرح الروماني برضه بيشغل افلام اطفال من ٧ و بعدين شو حلو اوووووي تنورة و روسب و بعدين فيلم سينما جديدة
بصراحة احلي عروض ليلية شوفتها فى فندق بالمنظر ده مع اني روحت فنادق كتير جدا ....بس الفندق هنا بيهتم بالأنشطة اوي يعني مش هتلحق تغمض عينيك حتي البارات (بتاعت السناكس و المشروبات) بيبقي فيها حياة و دوشة كده جميلة.
الألعاب الموجودة مجانا كرة طائرة و بينج بونج و كرة قدم و يد و تنس و العاب شاطئية😅
في بقي اهم حاجة اللي عرفت ليه الناس بتيجي هنا ٤ او ٥ سنين ورا بعض ..الاستاف اللي بيشتغلوا يا جماعة عندهم ولاء للفندق ملقتهوش في فندق قبل كده و كأن الفندق ده ملكهم ...و بيحاولوا يحافظوا علي سمعة المكان اووووي و كلهم عايزين يشيلونا من علي الارض شيل و خصوصا..
🌹 مستر محمد جابر مدير البارات .. بجد مشوفتش مدير بيهتم بالنزلاء بالشكل ده كل الناس بدون استثناء صورة مشرفة فعلا ..الراجل ده شغال زي النحلة بتلاقوه في كل مكان و بيحاول يخليكم سعداء باي وسيلة فعلا يستحق كل التقدير لمجهوده الجبار خلانا عايزين نزود الاقامة بس للاسف معرفناش🌹
🌹 مستر شريف مدير المطاعم اللي بيحسسك ان الفندق ده ملكه من كتر خوفه علي المكان و حرصه علي سمعته و تقديره الشديد لإدارة الفندق 🌹
🌹 مستر أسامة مدير البسينات و كابتن محمد و ا. خالد حاجة بجد فوق الوصف 🙏
🌹 المسئول عن نظافة الاوض ا. حسن بكر فعلا مجهود جبار و نضافة فوق الوصف👍
نضافة الاوض ..انا كنت في مبنى رقم ٤٠٠٠ سوبريور السعر بيزيد ٣٠٠ جم عن الغرفة العادية الاوض فلة بمعني الكلمة و الفندق كله بصراحة ملقتش اي حشرة بس احنا بنقفل باب البلكونة باستمرار و فيو الأوضة جاردن و مش فارق عندي لاني مش بستخدم البلكونة اصلا 😅
المطعم المكسيكي تحففففة ازاي محدش كتب عنه مش عارفة شكرا ا. محمد .
مطعم السمك جميل اوي و الفيو يجنن بجد و المطعم اللبناني شكرا ا. أسامة و ا. مينا 🌹
فيه ريفيوهات اتكتبت قبل كده عن المطاعم و السناك بار و كل الحاجات دي بالتفصيل فمش هكررالكلام تاني
نصيحة بقي لإدارة الفندق لو فيه حد منهم في الجروب ..انتوا عندكم إمكانيات مشوفتهاش في فنادق كتير زي المساحة و جمال الحدائق و كل الحاجات دي فياريت نزود عدد الترابيزات في المطعم خصوصا التراس علشان مش كل مكان يبقي زحمة كده صدقني هتفرق كتير مع حضرتك.
المشي يا جماعة مش كتير زي ما الناس بتوصف يعني الاوضة قدامها علي طول البيسين و جنبها المطعم و الاكوا و بينها و بين البحر ٦ دقائق ..ثانيا جمال المكان يخليك مستمتع جدا في المشي بين الحدائق و البرجولات الجميلة 🥰
البحر رملي و راااااائع جدا ... الفيو برضه في كافيه بيلا فيستا جميل اوي.
و اخيرا هل هاجي هنا السنة الجاية ان شاء الله؟؟؟
ايوه 🥰 لان الفندق يخليك تحبه اوي بس هختار وقت مختلف ممكن نص سبتمبر او اول يونيو علشان أستمتع اكتر من غير الزحمة و الحر الشديد..و اخيرا اتمني اكون ساعدتكم و طمنت شوية الناس اللي حجزت و وضحت لإدارة الفندق وجهة نظر النزلاء
شكر خاص لأستاذ محمد جابر و استاذ شريف احسن صورة لمدير في فندق 🙏🙏