الاكل حلو جدااااا بس العاملين في الاوتيل عدد قليلللل ،بس الانيميشن تيم لطيف جداااا ومتعاون مع الكل ،بس الخدمة مش احسن حاجة ،بس اكتر حد في الانيميشن تيم لطيف وهي Marwa حبيتها اوي وتعاملها لطيف جدا ولدوده جدا
Toma entertainment

صباح الخير..
يا رب البوست يتقبل...
تجربة فندق ستيلا مكادي جاردن ...
تجربتنا قبل كدة لمدة سنتين ف بالم رويال سوما باي...
و طبعا مع غلو الاسعار.. روحنا لحاجة مناسبة للبادچت..
٣ ليالي
نبدأ ب المميزات:
- استاذ مقار المسؤل عن التسكين و الديسك.. شخص اكتر من رائع و حقيقي خدوم رغم الزحمة و ظبط الدنيا و الغرف قبل الوصول و احنا كنا عدد غرف كبير...
- الغرف نضيفة و واسعة و الڤيو حلو الحقيقة
- الاكل معقول .. تقريبا الاصناف مكررة و يوم الsea food كان اطعم حاجة فيه الجمبري الطازة اللي بيتعمل قصادك
- ال house keeping ماتأخروش علينا لما طلبناهم في مشاكل ف الغرفة..
- الانيميشن لذاذ جدااا
- سناكس علي البحر لطيفة و الشيفات لطيفة الحقيقة
العيوب:
- طبعا الزحمة الرهيبة... تحس ان في سبق حد يلحق مكان حد...
- في المطعم احيانا مكانش مستوعب كم الناس ف الفندف
- في اطفال بتبقي عايزة تمسك الحاجة من ايدك و انت بتغرف الاكل قبل ما تسيب الماسك و انت بتحط ف طبقك !!!(مش صابرين عليك) و الكبار احيانا كتيرة باردين الصراحة و مافيش ذوق
- اكتر عيب قاتل... الwaiters ... متكدرين بس .. لدرجة اني كنت هشتكي حد بالذات فيهم... متعصب .. غير بشوش بالمرة.. غير مساعد... بيلم الاكل من علي الترابيزات و احنا قاعدين و لما بنقول سيبه هو مش مدي فرصة لنفسه يسمع حتي و بيلم و يرمي.. (عايز يخلص) لدرجة انه ف مرة قالي دة خلاص !! بعصبية و لما بقوله انت متنرفز علي ليه سابني و ماردش... و حقيقي لو كان اتكرر كنت قدمت فيه شكوي رسمية...
الباقي بقي تقوله عايز شوكة... عايز معلقة.... عايز سكينة .. يغيييييب او ينسي.. الا لو انت واقف قصاده او يدلك علي حد تاخد منه او لو الراجل اللي ماسك الشوك و المعالق و السكاكين يعدي عليك كدة و تطلب منه ....غير كدة مع نفسك..
حقيقي خدمة صعبة...
محدش بيعدي عليك يقولك محتاج حاجة.. الدنيا تمام... مافيش حد بيسأل فيك...
لو انت محتاج تشرب حاجة اتفضل قوم خدها بنفسك....
لو محتاج ماية قوم من الديسبنسر محدش هيجبلك حاجة مافيش ازايز ماية غير ف الاوض هما ٢ صغيرين بتحتطوا ف اليوم..
- التكيف ضعيف جداااا ف الغرفة
- الميني بار ضعيفة جدااا
- الاكل مكرر.. اصناف كتير اه بس ضعيف.. الاستاف الشيفات اللي بيديك الاكل مش بيسألك محتاج تاني ولا لأ.. في واحد قعد يومين يدينا الكفتة مثلا ( كانت قد الطعمية دة المكورة الصغيرة) و حتتين و كأنه بيديك من لحمه الحي.. (و لما كلناها مكانتش حلوة ) .. الراجل يعني غير بشوش بالمرة . متكدر برضه...لما عملوا فراخ مشوية سابها تتحرق تقريبا..
يوم واحد بس كان في استاف شيفات لذاذ جدااا واقفين ف البوفيه بشوشين و حلوين و مؤدبين يوم واحد بس الحقيقة ( لكن الwaiters هما هما) .. الباقين موظفين حكومة..
- ال. Pools زحمة جداااا.. مش نضيفة .... في واحد اتقفل كذا مرة ..
- البحر .. بعيد . لانه صف تاني ( دي حاجة عارفينها) الشاتل باص بيجي كل ١٠ دقايق.. لو اتمشيتها مرهقة فرهضة خصوصا لو معاك اطفال.. و لو الباص اتأخر ... (هو باص واحد) تلاقي اللي داخلين عليك و انت نازل كأنك ف محطة مترو البحوث (اجانب و مصريين ) داخلين هجوووم
في لسان تنزل منه ف نص البحر . (الجزء الرملي) بس سلمه صعب.. لو معاك اطفال برضه لازم حد يبقي معاك يساعد ف الطلوع و النزول علشان محدش يقع... اللسان طويل..
- و احنا ماشيين اللي نزلوا الشنط ماسعدوناش حتي ناخدهم العربية.. سابوهم علي باب الاوتيل... و احنا اللي دخلناهم بنفسنا...اللي هو help yourself ... مهو حضرتك اكيد هتاخد tips مقابل تعبك ..
الصراحة الاستاف محتاج يتعاد النظر فيه
انا شخصيا تجربة مش هكررها و شوفت اد ايه الخدمة مقابل سعر..
بس حقيقي لازم يتعاد النظر ف الاوتيلات اللي هو حرام فعلا .. الاسعار بقت عالية. و اللي هيسأل علي الاوتيل الليلة ف الدبل مش رخيصة برضه.. كل واحد بيستني الكام يوم دول يغير فيهم جو.. ( سعر الليلة ما بين ٣٠٠٠ ل ٣٢٥٠) تقريبا اللي هو برضه مش رخيص يا جماعة..
لازم نبقي ندفع ٦٠٠٠-٨٠٠٠ ف الليلة علشان نروح مكان كويس...!!! حقيقي بقت حاجة صعبة