فندق زبالة والعملين فيه ازبل بجد فى حسام فى الرسبشن بيع طماطم وكمال مدير الاتيل حد مش محترم طارق رجب فعلا انا ندمانة فى التعمل معاهم ولو ينفع انزل فديو للفندق والمعملة السيى هنزل ياريت حد يكمنى من الفندق للاسف مفيش حد ياحسب الفندق ده

تيا هايتس – متعة الترفيه
بالرغم اني راجعت معظم الكومنتات اللي على الاوتيل في مواقع زي Booking و TripAdvisor ولاقيت معظمها سلبي وكان محور السلبية في 3 حاجات رئيسية 1- الأكل 2- الغرف 3- بعد مسافة الغرف عن الأكوا لكن عجبتني جدا الأكوا الكبيرة مقابل السعر المعروض من الأوتيل فاخذت قرار المغامرة انا واسرتي باني استغنى عن جودة الاكل والغرف ( زي ما في معظم الكومنتات ) في سبيل اني استمتع بالاكوا وكانت هذه تجربتي
هبدأ بالإيجابيات لأني بصراحة لاقيتها اكتر بكتييير من السلبيات
مبدأيا هكتب خلاصة كل الكلام اللي هقوله في سطرين " لو عايز تستمتع بأكوا كبيرة وحمام سباحة كبير وبحر ولا اروع وعايز تستمتع بالشعب المرجانية ومشاهدة الأسماك في مقابل انك تتنازل بعض الشيء عن جودة الأكل وبسعر مناسب يبقى تيا هايتس اختيار موفق و موفق جدا وهتتبسط جدا جدا جدا ، انما لو رايح تاكل وتشرب وتنام وعايز خدمة خمس نجوم فلا مش هو ده الإختيار خالص "
تيا هايتس هو في الحقيقة منتجع ترفيهي بسعر متوسط
تيا هايتس هو منتجع من فئة المنتجعات الضخمة – المنتجع مقسم الى 3 اقسام 1- المبنى الرئيسي 2- منطقة الأكوا والمباني الملحقة بها 3- منطقة شاليهات دورين بحدائق
1- المبنى الرئيسي ( مكان الإقامة ) هو مكان منفصل عن منطقة الأكوا لراغبي الهدوء بعيدا عن ضوضاء الأكوا وده اللي بيضم منطقة حمامات السباحة والبحيرات والكافيتريات الخاصة بها وبعدها شاطيء البحر
- اللوبي ضخم جدا ورائع والجلوس فيه رائع ويتوسطه بار – ويوجد منطقة جلوس رائعة ايضا في الدور الثاني
- الإستقبال كان جيد ( ولكن للأسف لم يتم تقديم المشروب الترحيبي عند الوصول )

غرف المبنى الرئيسي " على حد قول العاملين " هي مميزة من ناحية الأثاث والخدمة والمساحة عن غرف المبنى الملحق بالأكوا – الغرف جيدة واثاثها جيد ولكن لا ترتقي لخمس نجوم – يعيبها ضيق الحمام - الفيو ممتاز على حمام السباحة او البحيرات .
مبنى الغرف فعلا ضخم ومساحته كبيرة والشيء الجيد ان له مخرجان مخرج يؤدي الى اللوبي ومنطقة المطعم والمخرج الأخر يؤدي الى منطقة حمامات السباحة بمعنى انك عشان تروح حمام السباحة مش لازم تمشي مسافة كبيرة وتعدي على اللوبي عشان تروح لمنطقة حمامات السباحة .
المسافة من الغرفة ( مكان الإقامة ) بالدور الأول في المبنى الرئيسي للأكوا لا تتعدى 4 دقائق وكذلك للبحر فالمبنى الرئيسي يتوسط المنتجع - يعني مهم جدا لو مش بتحب المشي او لو معاك ناس كبار في السن – يبقى انصحكم بالإقامة في المبنى الرئيسي
المسافة من المبنى الملحق بالأكوا الى منطقة الأكوا في حدود 10 دقائق مشيا على الأقدام " مسافة طويلة بعض الشيء " وتزداد لو رحت للبحر – للأسف مافيش طفطف للتنقل داخل المنتجع – يوجد تكاتك مثل الجونة ولكن كانت معطلة ولا تعمل.
2- منطقة الأكوا ولا اروع اكوا رائعة وممتعه ولكن تعمل 4 ساعات فقط ( من 10ص حتى 12م – ومن 3م حتى 5م ) - يعيبها عدم التنظيم الجيد والحزم من العاملين عليها تجاه بعض التصرفات الأنانية والهمجية من بعض الجيستس واللي لابد من ادارة المنتجع توجيه العاملين عليها للتعامل معها بكل حزم – منطقة الأكوا بها بار لتقديم المشروبات وبها بار ايضا في الدور الأول لتقديم السناكس مثل ساندويتشات السوسيس والبرجر والبطاطس والسلاطات والحلويات - ايضا بها حمام سباحة بالأمواج ولكن يعمل ساعة واحدة فقط !!!! نصف ساعة صباحا ونصف ساعة بعد الغداء !!! يا تلحق يا ماتلحقش !!! مش فاهم ليه - بس تجربة لذيذة - ايضا ملحق بها منطقة اكوا للأطفال كبيرة وجميلة -
3- منطقة حمام السباحة جميلة ويوجد بها بار يقدم المشروبات والسناكس مثل ساندويتشات السوسيس والبرجر والبطاطس الجبنة والسلاطات والحلويات

4- البحر – الشاطيء رملي ولا اروع اول ما تروح الشاطيء هتلاقي عامل بيستقبلك بترحاب وياخد الفوطة يفرشهالك على الشوزلونج – ومن هنا بقدم فعلا الشكر للسيد المحترم / عامل الشاطيء استاذ ( عبد الرحمن ) على حفاوة الأستقبال كل ما كنت اروح الشاطيء فعلا شكرا ليك ولذوقك – البحر مياهه نقية جدا وفيه شعب او ريف او بيت سمك كبير جدا وكمية اسماك كبيرة وجميلة ومتنوعه يستمتع فيها اللي يحب يتفرج على السمك من غير ما يروح رحلة لأعماق البحار.

5- المطعم : منطقة المطاعم بالدور الثاني يوجد المطعم الرئيسي " TIA " المطعم كبير ونظيف وتم افتتاح مطعم اخر لأستيعاب زيادة اعداد الجيستس ويوجد اعمال بالدور الأرضي لفتح مطعم جديد اخر امام منطقة البحيرات والمسابح– الفطار ممتاز ومتنوع جدا - الغداء والعشاء جيد يعني ممكن اديلهم 10/6.5 مع توافر مستمر للأنواع ولكن قلة في التنوع في الأطباق الرئيسية - تنوع جيد جدا للسلطات – بوفيه الحلويات فقير من ناحية التنوع والجودة وللحق الناس بتبذل قصارى جهدها .

6- فريق الترفيه او الأنيميشن تيم ضعيف : غير متواجد خلال اليوم لا على حمام السباحة ولا على البحر.

7- الشو الليلي ممتاز ومختلف يوميا – ولكن يعيبه قربه من مكان بعض الغرف مما يسبب ازعاج للي فضل الجلوس في غرفته او لو عندك اطفال ونايمة او لكبار السن اللي مش عايزين ازعاج . – منطقة الجلوس بعد الشو الليلي على حمام السباحة والأضواء الخافتة تجربة جميلة مع مشروبك المفضل والجو المنعش .

السلبيات :
1- عدم تقديم مشروب الترحيب عند الوصول ( وهي حاجة صغيرة بس تفرق كتيرانك تحس ان صاحب البيت بيقدر ضيفه )
2- الطوابير ( الغير مبرره ) على الأطباق الرئيسية في الغداء و العشاء !! بصراحة شيء غير مبرر وغير مهني بالمرة من الإدارة وحتى يعني حاجة مش كويسة خااالص في حق ادارة المنتجع - وللعلم اتكلمت مع الشيفات وكمان اتكلمت مع مستر / عبد الوهاب مشرف المطعم اللي فعلا اعتذرلي كتير وقلتله على حل عملي بحكم تواجدي في اوتيلات كتير في البحر الأحمر وطريقة تعاملهم مع الموضوع ده ازاي منعا للطوابير والشكل الغير لائق وقاللي انه هيوصل الحل ده للإدارة ( ارجوا ذلك حرصا على المظهر العام وعلى مجهود العاملين اللي بيضيع بسبب زي ده ) .
3- عدم التنظيم الجيد والحزم من العاملين على الأكوا تجاه بعض التصرفات الأنانية والهمجية من بعض الجيستس واللي لابد من ادارة المنتجع توجيه العاملين عليها للتعامل معها بكل حزم.
4- قرب مكان الشو الليلي من بعض الغرف مما يسبب ازعاج للي فضل الجلوس في غرفته او لو عندك اطفال ونايمة او لكبار السن اللي مش عايزين ازعاج .
5- قصر وقت تشغيل حمام السباحة بالأمواج الصناعية – يجب عدد زيادة وقت تشغيله .

في النهاية باشكر معظم العاملين في تيا هايتس على ابتسامتهم ومعاملتهم الممتازة