الأكوا رائعه و ممتعه وخدمات مميزه و تعامل ممتاز من العاملين بالفندق من الأستقبال و خدمه الغرف والعاملين بالمطاعم و موظفين حمامات السباحه والأكوا.
الشاطئ جميل و هادئ وبه مطعم ممتاز و ينقصه خدمات ترفيهيه.

دي تجربتي مع جاز اكوافيفا
قبل اي حاجة حابة اشكر مستر Ramez Joseph جدا جدا على تعاونه وترحابه حقيقي شخص بروفيشنال جدا وبشوش و متعاون لاقصى درجة
هكتب اولوياتنا بالترتيب:
اولا : التسكين: كنا رايحين قلقانين جدا من التسكين لاننا واصلين بدري اوي حدود الساعه ٩ ونصف لكن التسكين تم بسرعة جدا اخدنا ٣ غرف واجلولنا ٣ غرف لحد الساعه ٢ ودي كانت لاول مرة تحصلنا انه نتسكن بدري كدة ودة لانه موظفين الرسيبشن هايلين ومتعاونين لاقصى درجة خصوصا مستر محمد .
ثانيا : الأكل والمطاعم :
الاكل حلو جدا والكواليتي بتاعته حاوة جداجدا وواضح ان الشيفات على أعلى مستوى بدليل انهمموجودين بنفسهم طول الوقت في المطعم علشان ياخدوا التقييمات بنفسهم هو اه الاكل مش اصناف كتير اوي و زحمة لكن كل فرد هيلاقي اللي محتاجه فعلا وبجودة عالية جدا ، ومن الحاجات المهمةجدا ان مفيش حاجة بتطلبها مش بتجيلك ولا يقولولك مفيش او خلصانة .
دة غير ان الاكل طول اليوم متوفر بمواعيد مختلفة والسناكس هناك روووووعة بجد لدرجة اننا احيانا كنا بنستغنى عن الغدا علشان ناكل سناكس وكانت بيتزا برجر شاورما فرايز هوت دوج ايس كريم وافل دة طبعا غير المشروبات والكوكتيلات اللي موجودة في كل البارات طول الوقت
ثالثا : الأكوابارك :
اكوا كبيرة ومميزة اوي اوي ومستحيل تزهق منها وعجبني اوي تقسيمهم للألعاب على عدد من المباني المختلفة بمعنى كل لعبتين او ٣ بسلم ومبنى مستقل ودة حلو اوي ومش عامل زحمة بعكس جانجل السنة اللي فاتت كان زحمة جدا ، كمان من اهم المميزات اللي عجبتني في جاز السيفتي عالية جدا جدا واجهزة اللاسلكي متوفرة مع كباتن الاكوا فوق وتحت علشان زيادة الامان ودةخلاني مطمنة جدا وتطمن على الاطفال بشكل خاص .
احقاقا للحق كباتن الاكوابارك شباب هايلين وشغالين عينيهم في وسط راسهم حرفيا ومهتمين اوي اوي بكل النزلاء على الاكوا و ودودين جدا جدا مع الكل واخص بالشكر زكريا وخليفة ومحمود واحمد اللي بقينا نطلع الاكوا علشانهم وعلشان روحهم الحلوة اوي
رابعا الغرف :
واسعة جدا ومريحة وكمان عملولنا upgrade للمجموعة كلها وكلنا اخدنا غرف family
كل غرفة فيها ٤ سراير والفيو تحفة والطراز شيك وهادي ومريح دة غير ان الفيرنيتشر كله جديد و نضيف اوي اوي وجوة الغرفة كاتيل ومياه وشاي ونسكافيه وكل المشروبات السخنة اللي تتخيلها، ال House keeping رائعين ونضاف اوي بجد .
خامسا البحر : الفندق صف تاني مفيش جواه بحر لكن فيه شاتل بتيجي بشكل دوري تنقلك لفندق تاني فيه بحر تبعهم برضو خلال ٣ دقايق بيوصلك للبحر وهناك فيه بار فيه سناكس وايس كريم وسندوتشات ووافل . البحر تحفة تحفة تحفة بجد لاول مرة نستمتع ببحر الغردقة كدة
والشاطىء نضيف و هادي و جميل .
خامسا الانيميشن تيم :
الانيميشن active جدا وطول الوقت بيلفوا على البيسين وفي كل مكان بس علشان يرضوك ويعرفوك برامجهم وفعلا مميزين وحفلاتهم ممتعة ومفيهاش ملل عكس فنادق تانية كتير كنا مابنحضرش الحفلات اصلا .
بشكل عام الفندق رائع والاستاف كله هايل من اول موظف لاصغر موظف كلهم متعاونين وفريندلى جدا خصوصا مستر رامز جوزيف كان رائع في التعامل معانا ومع اي موقف شخص بروفيشنال جدا

الاجازة كانت اكتر من رائعه والفندق والاستاف هايل الايجابيات كتير اووى ، انا وصلت الاوتيل بدرى الساعة ٧:٣٠ وفوجئت بالعاملين فى الريسبشن انهم دخلونى الغرفة بعد ما وصلت ب١٠ دقايق فقط! انا قلت اكيد هنتظر لميعاد التشك ان١٢ الظهر ولكن هما كانو فى قمة الذوق والاحترام بجد ، الاكوابارك فظيعة ونظيفة جدا وكل العاملين فيها محترمين وودودين جدا حابة اشكرهم محمد وعبد العزيز وحسن واحمد ناس بجد ذوق ومحترمين جدااا .. انا كنت رايحة احتفل بعيد ميلاد وفوجئت بتورتة جتلى على الاوضة وفى المطعم الرئيسى بليل احتفلو بيا كمان حابة اشكر مستر عصام ومحمد وحيد وحاتم وسيد وعبد الله واحمد بجد اسعتدونى جداا❤️ وفؤجئت كمان باحتفالهم ليا فى مطعم البول مستر احمد وشيف مدحت واحمد وسيد وكل الاستاف هناك بجد شكراا لذووقكم اووى 🥰 مقدرش انسى كمان احلى كوكتيلات شربتها هناك اللى كانت بتجيلى من غير ما اطلبها والله مستر محمد رشدى مدير البارات وكل الاستاف المحترم اللى معاه .. بليل بقى كان الانميشن تيم بيعمل عروض تحفة رامى ولوكا واحمد ودونيكا كانو عاملين جو حلو اوى بجد بليل ويوم عيد ميلادى خلو الفندق كلو يحتفل بيا شكرا ليكم بجد .. السلبيات فقط كانت فى عدم تنوع الاكل انا فوجئت بعد ما وصلت انو ست منيو وكان الغداء كل يوم زى العشا تقربيا باختلاف صنف واحد ودا ضايقنى شوية لانى زهقت من نفس نوع الاكل بس اللى فهمتو من الاستاف ان الفندق لسة فاتح وعدد الجيست قليل ودا انا لاحظتو فعلا .. غير كدا كل حاجة هايلة شكرا اكوافيفا على الاجازة الحلوة دى💕