هحاول ماظلمش الفندق
لكن خلاصة القول انه عادي جدا وفى احسن منه فى نفس الفئة السعرية
ندخل على التفاصيل
كل حاجة جنب بعضها .. مش هتتعب فى التنقل من اى مكان لأى مكان
مافيش مكوة فى الفندق
فندق خمس نجوم ومافهوش مكوة مش فاهم ازاى
الدنيا هادية نوعا ما
البشاكير بتتاخد تتغسل وتجيلك بعد ما تتغسل.
يعني فى كام ساعة كدة هتقعد من غير بشاكير
طاقم العمل مابين ناس بتتعامل معاك بذوق ومابين ناس بتتعامل بتناحة
بس الحق يتقال لغاية دلوقتي الناس الذوق اكتر
الغرف مستواها عادي
التليفزيونات قديمة جدا
احنا فى ٢٠١٨ والفندق فيه تلفزيونات المكعبرة القديمة دى اللى مابقتش تتباع من سنين
مش مهم مش جاى اتفرج على التلفزيون
بس عيب فى حق الفندق
مافيش مكوة فى الفندق
العروض المسرحية الترفيهية للكبار بفلوس
اول فندق اشوف فيه كدة
كل الفنادق اللى احسن منه العروض شغالة كل يوم ببلاش
لكن ده عنده عروض اطفال ببلاش واى حاحة تانية ب ٥ دولار الفرد
مافيش كاتل فى الغرف .. بفلوس
المشروبات .. مياه غازية وبتاع كدة بيقولوا عليه عصير مانجة
الاسناكس من الساعة ١٢ للساعة ٣
بس
اللى هو وقت الغدا
على حد علمي الأسناكس ده بيبقى بين الوجبات
لكن ادارة الفندق ليها تصور تاني خارج الصندوق تماما
الأكل
بغض النظر عن ان الأكل اذواق
وان اللى مش عاجبني ممكن يعجبك
بس اعتقد ان كلنا متفقين ان لازم يكون فى تنوع كل يوم
ويبقي فى صنفين مثلا مميزين.
لكن لا
اغلب الأكل عبارة عن سلاطات وطبيخ وشوية اصناف مسلوقة
وعيش كتير وحلويات
ممكن تلف البوفية كلة وتخرج بالطبق فاضي
تخيل كدة ان يكون فيه مكان فى البوفية مميز وتروح تلاقى بتنجان مقلي.
من كتر الأكل المسلوق كلمت الشيف قولتله انتوا عازمين ارانب ولا ايه
انا مش محسوك فى الأكل
لكن الأكل هناك ملوش اى لازمة
مش عارف اجبهالكم ازاي بس الفندق مافهوش مكوة
ودى حاجة مضايقاني جدا
احنا بنلم هدومنا فى شنط وبنوصل بيها متبهدلة
وديما بنزل اى فندق ايا كان مستواه اول حاجة بطلبها المكوة
بكوى الهدوم كلها مرة واحدة وبرجع المكوة
انما هذا الفندق زى ما قلنا خارج الصندوق
بالمناسبة
الدور الأرضي لا يرى البحر
اكرر الدور الأرضي لا يرى البحر
شركات السياحة بتبيع الفندق على ان كل الغرف على البحر
لكن لا .. الدور الأرضي شايف يا جنينة يا حمام سباحة وصعب اوى تشوف البحر منه.
وبص على الصور المرفقة وانت تتأكد
هل ممكن اجى الفندق ده تاني؟
اكيد لا
1,343
831
500
279
237
