فندق لونا شرم اقذر فندق دخلته في حياتي وكانت تجربة مروعة وبحذر اي حد أنه يروح هناك ولا نظافة ولا اكل والصور الي موجودة علي جوجل مزيفة

دخلت الفندق امبارح كنت حاجز غرفة ثنائية وغرفة ثلاثية لثلاث ليالي بوجبتين فطار وعشاء بوفيه مفتوح

دخلت الغرفة الثلاثية مفيش دولاب ومجرد رفوف خشب قديمة رفضت وغيرت الغرفة لغرفة تانية فيها دولاب لكن مفيهاش مياه ساخنة ولا صابون ولا التليفون الداخل وكل ما بحتاج اطلب حاجة لازم اروح الريسبشن بعد ما استلمت الغرف علي عيوبها ووعد أنه هيحل المشكلة قولت نروح الشاطىء علي ما يصلح المياه ويجيب صابون

الفندق المفروض ليه شاطيء خاص وفيه اتوبيس بيوصلك الشاطيء سألت الريسبشن عن ميعاد الاتوبيس قالي الساعة ١١ فضلت منتظر كتير وبعد كدة قالي الاتوبيس عطلان وهتروح الشاطيء بالتاكسي علي حسابك وبالفعل اخدنا تاكسي وروحنا الشاطيء ورجعنا علي امل ان تكون المياه الساخنة اشتغلت ولقيناها لسا متصلحتش وفضلنا بدون استحمام لحد الساعة ٧ مساءً ولما اخويا راح يسأله قاله انا مش هغير غرف تاني روح الغرفة التانية استحمي هناك .

والمياه لم يتم تصليحها الا بعد اعتراض من نزلاء اجانب اتخانقوا معاهم وسابوا الفندق .

ده غير حمام السباحة قذر وفيه حشرات وورق شجر .
كمية ناموس عمري ما شوفتها اكتر من ٥٠ ناموسة طايرين حواليك

الفندق متهالك ونتيجة لذلك مفيش حجوزات وكل الغرف فاضية ومكانش فيه غيرنا في الفندق الي عامل زي بيت الأشباح

جه ميعاد العشاء الساعة ٧ اتوجهنا للمطعم لقيناه فاضي ومهجور روحنا نبص علي المكان الي فيه الأكل ملقيناش اكل وجالنا واحد قالنا نظرا لقلة عدد النزلاء معملناش بوفيه مفتوح والعشاء هيكون سيت منيو قولتله مفيش مشكلة

شوية ولقيته بينزل الأكل بدون ما يجيب القائمة الي نختار منها بقوله أنا مختارتش حاجة لقيت الويتر قالي احنا عاملين لكم سمك ورز قولتله مش مشكلة خصوصا أن انا بحب السمك اصلا
وكانت المفاجأة جابلي شوية رز بالشعرية وقطع سمك صغيرة بواقي فيليه مقلي

اعترضت لأن انا ووالدتي اخويا مش بناكل مقلي وطلبت المدير وجالي واعتذر وقال إنه هيعمل كفتة وهيشيل الفيليه وبعد انتظار كتير كانت المفاجأة ونزل لنا احنا الخمس أفراد طبق كفتة عبارة عن ٨ صوابع كفتة صغيرين ميأكلوش فرد واحد فقمنا وسيبنا الاكل وروحنا جيبنا تونة وجبنة واتعشينا واول ما الصبح طلع سيبنا الفندق القذر وروحنا فندق تاني بنفس السعر ويمكن اقل كمان لكن ارحم من فندق لونا الي ميستاهل يطلق عليه فندق

كان من المفترض ان نقيم ثلاثه ايام لكن للاسف الشديد بسبب سوء الادارة وعدم الحرص علي نظافة المسبح وتعقيمه بالشكل المناسب الذي يحمي النزلاء ورداءة نظافة الغرف وتعطل المغاسل والدش بالحمام افسدت علينا الرحله ونقلنا لمنتجع اخر يراعي النظافة والتعقيم وراحة العملاء

فندق نظيف ولطيف....ادارة الفندق محترمه وكل العاملين على خلق ومهذبين ومتعاونين .به بيسين جميل الغرف جيده ولكن النزلاء للاسف البعض منه اساء استخدام الاشياء فمثلا مابالكم من يطفي سيجارته فى البسين وبجواره بوكس القمامه ومابالكم بعض الاسر تعمل حمام لاطفالها فى البسين مما يجعل ادارة الفندق تغير مياه البسين وما بالكم بافراد واسر تستهلك مأكولات المطعم بطريقه استفزازيه وللاسف كل ذلك يرمى فى القمامه ومابالكم بالتعمد للبعض وليس الكل برمى القاذورات واكواب الشاي الفارغه فى الحديقه والبسين وما بالكم برفع الاصوات فى البسين والتصفير بمجرد رؤيه اجنبيه ...هل هذه الحضاره التى نتغنى بها ...لابد من تغير السلوك والاخلاق حتى ينعم علينا المولى سبحانه وتعالى بالخير فالمسلم ليس بالاسم ولكن سلوك يومى وحضاره خلقيه ....فالحمدلله اننى مسلم