ريفيو مفصل عن كيروسيز بارك لاند انا كنت هناك يوم ١٢ /٧ ياريت حد من المسؤلين عن الأوتيل يكونوا موجودين هنا و يشوفوا كلامى ...
اولا الإيجابيات :
الأوتيل نضيف جدا جدا بصراحه و الاستاف كلهم ذوق جدا الأوتيل واسع و كبير و مريح نفسيا إلى أقصى حد
الاكوابارك تجنن و البيسينات جميله و كبيره
آخر يوم كان معايا ناس ضاع منهم دبله دهب و بلغنا الاداره و طلعوا ناس فتشوا الاوضه و الهدوم حته حته لحد ما لقوها جوه الهدوم و دى حاجه تتحسب لهم طبعا
الاوض بتاعتنا كانت جميله و نضيفه وواسعه
اللايف جارد مركزين جدا جدا مع الأطفال
البحر الرملى و البحر الصخرى حلوين جدا و تحفه فعلا
السلبيات :
الاكل لا يتماشى مع اوتيل ٥ نجوم اطلاقا ولا حتى ٤ نجوم انا قعدت ٣ ايام مافيش مره فيهم كان فى مشويات خارج المطعم و الاكل مكرر و مش متنوع بس الكميات مفتوحه عادى و ممكن تاخد اكتر من مره مافيش مشكله بس انا ٣ ايام باكل مكرونه و الحلويات برضو هى هى مافيش اى تنوع
مره كنت راجعين من بره بالليل هنموت من العطش و دخلنا الريسبشن نشرب قالوا الميه اخرها الساعه ١١ و مافيش ميه حاليا إلا لو هتشترى هيبقى فى عادى 😏😏😏
أسوأ و أسخف حاجه فى الأوتيل و إللى قفلتنى منه حرفيا هى مواعيد الباص بتاع البحر .... لازم يفوت عليك وجبة الغدا 😂😂 لأن فى ٣ مواعيد للرجوع. ميعاد فيهم هترجع الاوتيل ٣ و ميعاد هترجع ٥ و طبعا كده الغدا خلص يا اما تروح ٨ و ترجع ١١ و ده الميعاد الوحيد إللى هتلحق فيه الغدا ... و لو فكرت تعتمد ع الاسناكس إللى ع البحر هتندم ندم حياتك لانها ماتتاكلش و احنا اضطرينا نرجع فى تاكسى لان الولاد ماكلوش اى حاجه ع البحر طبعا و كان صعب يفضلوا من غير اكل لحد ٧
فترة اقامتنا مكنش فى اى انيميشن تيم بالمستوى المقبول و كانت كلها حاجات فاشله كده بس و احنا ماشيين كان فى حفله ع البيسين
ياريت اكون قدرت اوضح الصوره بشكل كويس يساعد اى حد عايز يروح الأوتيل ❤

الفندق كويس في حاجات و مش كويس في حاجات نتكلم بالتفاصيل
الغرف مجدده شيك مساحه معقوله كل حاجه فيها حتي المياة و الشاي و القهوة و الكاتيل بيجيلك زجاجه مياة كبيرة كل يوم عيبها التكيف كان صوت المروحه عالي و في غرفه كان التكيف ضعيف
الفندق كبير في ٢ حمام سباحه كبار بلس الاكوا و كانوا نظاف و في لايف جارد لكل حمام و منتبهين جدا للناس
المطعم كان أول يوم زحمه بس شغلوا المطعم التاني فكان الوضع كويس الاكل مهتمين بالكميات علي حساب الطعم بتلاقي حاجه او حاجتين اللي ليهم طعم في وسط الاكل المشروبات متوفرة بارد و سخن السناك ضعيف سندوتشات سويس و بطاطس البيتزا لازم تدفع
العاملين اللي في تنظيف الغرف و الليف جارد كويسين انما اللي في المطعم و علي البارات مفيش روح تعامل اللي بعده
الانميشن كان متفاعل مع الناس و في حفلات بالليل و في كمان سينما و طاوله بينج و بلياردو
كان في حاجه مش ظريفه كان في ناموس بالليل
في المجمل انا شايف ان الفندق ممكن يكون كويس بس مش في اوقات السيفون
ممكن اديله ٧ من ١٠

انا جزائرية وآلله على ما اقول شهيد احسن فندق شفته في حياتي من الخدمة والراحة وحسن الضيافة وكلهم محترمين من مدير الفندق استاذ شحاتة لصغيرهم والاكل حلو والنظافة والخدمات واللي انت عاوزو متوفر واللي يقول غير كده مش صحيح بصراحة يستاهل اكثر من 5نجوم أنصح كل واحد يشوف تعليقي يحجز هنا ومش حيندم 30سنة في اروبا ماحسيت بالراحة إلا هنا انا مش ببالغ اقسم بالله حقيقي حبيتهم كلهم ورجعالهم تاني بإذن الله