فندق شارميليون كلوب اكوا بارك الفندق اللي اختلفت عليه الأقوال ما بين ناس بتشكر فيه جدا و عايزة تكرر التجربة و بوستات بتلعن اليوم اللي دخلوا فيه الفندق ده ..لدرجة خليتني مرعوب و فكرت ألغي الحجز بعد ما كنت حجزت بالفعل قبل ما اتكلم عن الفندق عايز اعرفكم بس اني من الناس اللي بتحب تتبسط في اي فندق مهما كان فيه عيوب باخد بالي من كل العيوب بس باعديها بمزاجي عشان احنا طالعين نتبسط مش نطلع القطط الفاطسة في بعضنا و بناءا عليه ..البوست اللي هاكتبه ده في منتهى الحيادية بدون أي مجاملة أو عصبية للفندق أولا موقع الفندق : الفندق صف تاني او تالت كمان في خليج نبق .. صف تاني يعني ملوش بحر لكن في باص بيروح بيتش فندق شارميليون سي لايف كل ساعة تقريبا (انا مروحتش البحر لكن معلومة الباص مكتوبة علي label قدام الريسبشن ) و خليج نبق يعني ٣ حاجات اولا الماية مفتوحة و فيها موج و البحر عموما مش حلو ثانيا يعني هتتبهدل ناموس (فلو ناوي تروح حاجة عموما في نبق خد معاك ( اووف طارد الناموس) ثالثا بعيد عن كل حاجة في شرم ..لكن عموما شارميليون يعتبر في أول خليج نبق فمش بعيد اوي ثانيا : تصميم الفندق : الريسبشن لازق في المطعم الرئيسي و بينهم ازاز فبيديك احساس اول ما تدخل الريسبشن أن الفندق زحمة جدا جدا و ده مش حقيقي متخافش اول ما تدخل تسكن و تستكشف الفندق هتكتشف أنه فاضي عادي بس الناس كلها محشورة عند الريسبشن 😁 ثالثا التسكين...فندق شارميليون كلوب اكوا بارك

الفندق اللي اختلفت عليه الأقوال ما بين ناس بتشكر فيه جدا و عايزة تكرر التجربة و بوستات بتلعن اليوم اللي دخلوا فيه الفندق ده ..لدرجة خليتني مرعوب و فكرت ألغي الحجز بعد ما كنت حجزت بالفعل
قبل ما اتكلم عن الفندق عايز اعرفكم بس اني من الناس اللي بتحب تتبسط في اي فندق مهما كان فيه عيوب
باخد بالي من كل العيوب بس باعديها بمزاجي عشان احنا طالعين نتبسط مش نطلع القطط الفاطسة في بعضنا

و بناءا عليه ..البوست اللي هاكتبه ده في منتهى الحيادية بدون أي مجاملة أو عصبية للفندق
أولا موقع الفندق :
الفندق صف تاني او تالت كمان في خليج نبق ..
صف تاني يعني ملوش بحر لكن في باص بيروح بيتش فندق شارميليون سي لايف كل ساعة تقريبا (انا مروحتش البحر لكن معلومة الباص مكتوبة علي label قدام الريسبشن )
و خليج نبق يعني ٣ حاجات
اولا الماية مفتوحة و فيها موج و البحر عموما مش حلو
ثانيا يعني هتتبهدل ناموس (فلو ناوي تروح حاجة عموما في نبق خد معاك ( اووف طارد الناموس)
ثالثا بعيد عن كل حاجة في شرم ..لكن عموما شارميليون يعتبر في أول خليج نبق فمش بعيد اوي

ثانيا : تصميم الفندق :
الريسبشن لازق في المطعم الرئيسي و بينهم ازاز
فبيديك احساس اول ما تدخل الريسبشن أن الفندق زحمة جدا جدا و ده مش حقيقي متخافش اول ما تدخل تسكن و تستكشف الفندق هتكتشف أنه فاضي عادي بس الناس كلها محشورة عند الريسبشن 😁

ثالثا التسكين :
اخدنا وقت في التسكين و دخل قدامنا ٤ أو ٥ جيست اجنبي كانوا بيخلصوا و احنا واقفين و كان كلام الريسبشن معانا قليل جدا
مكنش قليل الزوق بس مكنش مرحب اوي بصراحة أو هو طبعه هادي نوعا ما (الله اعلم)
و لما روحنا اتغدينا و رجعنا لقينا كذا جيست اجنبي خلصوا قبلنا فسألته هو ليه التأخير كدة (من غير صدام و من غير ما اذكر أن الأجانب بيخلصوا قبلنا)
فرد عليا : بنحاول نوفر ٤ غرف جنب بعض زي ما حضرتك طلبت يا فندم
فكان رده مقنع لأننا فعلا كنا طالبين الغرف تكون جنب بعضها و استسلمت للتسكين المتأخر حوالي الساعة ٣ و نص تقريبا ...

رابعا الغرف :
المساحة : كان في ناس بتقول دي واسعة و ناس بتقول دي ضيقة
لكن اللي لاحظناه أن الغرف ال double bed بتكون واسعة و فيها سرير زيادة للاطفال كمان
و أن الغرف الكينج سايز بتكون اصغر شوية
الفيو : اخدنا فيو يعتبر اسفلت فيو ..يعني ولا جاردن ولا بوول فيو ..بس اللطيف في الموضوع اننا كنا شايفين البحر من عندنا 😁😁 فاحنا اعتبرنا اننا سي فيو في فندق مش ع البحر اصلا ( بجد مش هزار )
النظافة : الغرف كانت نضيفة جدا و خصوصا الحمام لدرجة اني كنت عايز اصوره
*ملحوظة علي جنب ..انا اي حاجة كنت بالاقيها حلوة كنت بافرح بيها جدا لان ريفيوهات الناس عليه و شتيمتهم فيه وقعت سقف توقعاتي خالص *
جودة الغرفة : كل الحاجات كانت بحالة كويسة جدا ما عدا الدش اللي وقع علي دماغي وانا لسة جاي اخد شاور (لحام عمود الدش فك ) 🤕
لكن بصراحة اول ما بلغت الهاوس كيبر بلغ الصيانة ومجرد ما رجعت من العشا كان الموضوع اتحل و بسرعة كبيرة ❤️

الاكل : و ده اهم حاجة بالنسبة لاغلبنا و خصوصا ليا انا و خصوصا بعد البوستات اللي كانت بتشتم في اكل الغدا و العشاء بتاعه ...
بصراحة الاكل كان جودة الاكل حلوة جدا و متنوع جدا
و في ركن دايما فيه شيف اسمه احمد بيعمل فطاير دايما أو بيتزا حلو جدا
و في ع العشا الشيف سامي و شيف ايمن متخصصين شوي ع الفحم برة سواء فراخ او كفتة و الاتنين كانوا احلي من بعض رغم أن محدش ذكر موضوع المشاوي ده في اي بوست قبل كدة
و كان دايما في العشا في ركن برضه بيتعمل فيه حاجة مختلفة كل يوم ..مرة ايس كريم مرة زلابية.. مرة كنافة ع الصاج
والفطار كان حلو جدا برضه
لكن اكتر حاجة مميزة في اكل الفندق ده هو الحلويات و تنوعها اكتر من الفنادق نفس الفئة السعرية في شرم .
حتى في الفطار كان ركن السويت باتسري مليان حاجات حلوة ( دانيش و أبل باي و كيك بلح و دوناتس ....)

المطاعم ال a la carte :
اتنين واحد ايطالي و التاني هندي و للمصريين تقدر تدخله لو قعدت ٧ ليالي 😁 ..طبعا حسيته شرط تعجيزية و خصوصا اني ملقتش ده في فندق قبل كدة فكلمت حد محترم كلم لي الإدارة و وافقوا لما لقوا اماكن متاحة و حجزنا في المطعم الايطالي و كان تحفة بصراحة

السناكس :
بطاطس و ساندوتشات بانيه في عيش كايزر بس

اقل بكتير من الفنادق اللي في نفس الفئة السعرية و اكتر حاجة دمها تقيل أنه مفيش ايس كريم في بار البول و بار الأكوا بارك
رغم أن مكنة الايس كريم موجودة في فنادق فئات سعرية أقل من شارميليون بكتير
و اللي هون الموضوع شوية أنهم احيانا كانوا بيشغلوا مكنة الايس كريم في العشا زي ما ذكرت فوق

البارات : مشروباتFor free
تانج تفاح و اناناس و ليمون و بطيخ و برتقال و كولا و فاتنا و سبرايت machine

و القهوة التركي ب ٢٥ و العصاير الفريش ب ٣٥ اظن و الموخيتو و بينا كولادا ب ٦٠

حمامات السباحة :
حوالي ٦ تقريبا لو انا عديتهم صح و كويسين و مناسبين لمساحة و اشغال الفندق
فيهم حمام سباحة يعتبر للكبار
وواحد للاكوا بتاعة الاطفال
و ٣ للاكوا بتاعة الكبار
و واحد امواج صناعية
كلهم نضافتهم كانت كويسة
باستثناء بتاع اكوا الاطفال لاحظته مش نضيف اوي يمكن بسبب الاطفال و يمكن عشان عمقه قليل و يمكن عشان في حمام كتير حواليه مبيخافش من البشر عشان النزلاء بيلعبوا معاه و بيأكلوه زي امستردام كدة فلقيت مرة ريشة جواه 😁
لكن باقي الحمامات كانت نضيفة جدا بصراحة

الاكوا بارك :بتاعة الاطفال حلوة و مناسبة لكل الاعمار
انما بتاعة الكبار لطيفة بس مش احسن حاجة
واخدة ضجة كبيرة ع الفاضي
أو بمعنى أصح كنت متخيلها اكبر و متنوعة اكتر و فيها العاب اصعب لكن كانت عادية مفيهاش الا لعبتين حلوين و الباقي زحاليق
طبعا ده مقارنة باكوا بارك فنادق زيه و اقل في السعر عشان طبعا مينفعش اقارن الأكوا بتاعته بفندق ضعفه مرتين في السعر
ده غير أن الكهربا قطعت مرتين في الفندق و كان شغال ع الجينيريتور الصبح بسبب إصلاحات في الطريق في شرم عشان مؤتمر المناخ فتقريبا نص الفترة اللي قعدتها كانت الأكوا (اللي هي المفروض الحاجة المميزة في الفندق ) مش شغالة للاسف !!

انشطة الاطفال (kids activities)
في كيدز كلوب الصبح و بعد العصر بيلاعبوا الاطفال و يرسموا علي وشهم
و في كيدز ايريا صغننة فيها كام لعبة و كام زحليقة في جنينة صغيرة كدة
و في يوم الاتنين الصبح بيجمعوا الاطفال في بيتزا داي و يقعدوا يعملوا بيتزا و الفندق يسويها و في الاخر ياكلوها
و طبعا من ٨ و نص لتسعة بالليل ليهم فقرة اغاني اطفال مع الانيميشن تيم

الانيميشن نفسهم : كانوا لطاف و زي العسل كلهم المصريين و الاجانب .. بيعملوا اي حاجة عشان يفرحوك بجد و طول اليوم طاقة ضحك و هزار
غير انهم ليهم جدول طول اليوم من تمارين الصبح و العاب في الماية و هم اللي كانوا بيرسموا علي وش الاولاد و مسابقات طول اليوم 🎯 darts و العاب تانية و الكسبان بياخد مشروب كوكتيل هدية غير مسابقات المسرح بالليل
و عروض الانيميشن الخارجية اللي بيجيبوهم من برة الفندق كانت رقص شرقي و رقص فرقة روسي و رقص تنورة و ساحر
بس انا كنت شايف أن انيميشن الفندق بالعابهم و خفة دمهم احسن من العك ده كله.

الهاوس كيبنج :
ده انا احترت اكتب فيه ايه بصراحة لأن له مواقف متناقضة مع كل واحد
قابل حد مننا و اول ما شافه قال له : يوووووه مصريين ؟! انتوا مبيجيش من وراكم غير المشاكل
و لما كان بيعمل الاوضة كام بيعمل اشكال لطيفة بالفوط لحد تاني مننا
و انا شخصيا كانت علاقتي بيه لطيفة و كنت باديله تبس و مع ذلك برضه كان و هو بيحط الريفيل زي ما يكون بيقطع من جلده
لو دخل لقى الشامبو محدش استعمله مبينزلش بتاع انهاردة
لو بقى ازازة الماية بتاعة امبارح لسة موجودة مبينزلش ماية تاني ع البار أو شاي او نسكافيه
الموقف ده اتكرر يومين لدرجة اني بطلت اديله تبس و مبقتش حابب حتى اتكلم معاه ولا اخليه ينضف الاوضة و خصوصا بعد ما عرفت موقف ( انتوا المصريين مبيجيش من وراكم الا المشاكل ده )

و في سليبرز موجودة مع الهاوس كيبر بس تقريبا بيطلعها للأجانب بس و مسألتهوش عليها لاني مكنتش عايز و لاني قفلت منه زي ما قلت من شوية لكن اتضايق من فكرة انها موجودة بس لفئة معينة ..احنا مش منها رغم أننا حاجزين all inclusive soft

اكتر حاجات ضايقتني في الفندق أنهم عاملين شوية مشاريع جوة الفندق
مثلا أنه مفيش ايس كريم علي بارات حمامات السباحة و مستبدلينها بأيس كريم معلب بيتباع بأضعاف سعره

أنهم مكلفين و صارفين في items و اصناف كتير
بس عاملين عربية فشار ب ١٠ جنيه بالليل
مع أن عربية الفشار بالفشار اللي فيها ميكلفش ٢٠٠ جنيه يوميا لو أكلوا نزلاء الفندق كله فشار
و اصلا اصلا عدد الناس اللي بتجيب فشار ميدخلش للفندق ربح يتعدى ال ١٠٠ جنيه في اليوم 😁
ده احنا لما كنا بنعمل ايفينت في الكلية ايام الجامعة كنا بنجيب عربية غزل بنات و عربية فشار بنأكل بيها الجامعة كلها و ببلاش مكانتش بتكلف ٤٠٠ جنيه العربيتين

ده غير تأجير عربيات اطفال جوة ..الربع ساعة ب ١٠٠ جنيه

ممنوع تصور بكاميرا أو موبايل و انت نازل من الأكوا عشان في مصور تحت هيصورك و تروح تاخد صورك بفلوس طبعا
الموضوع للحظة بيخليك تنسى انك جوة فندق خمس نجوم و تحس انك قاعد في ملاهي المعمورة
من الاخر اكتر حاجة معصبااني أن الإدارة بتصرف في الغالي و مكلفين اكل و حلويات كتير في كل الوجبات و ( تيجي في الفارغة وتتصدر )

والحاجة المهمة جدا اللي لاحظت أنهم بيستخسروها غير الايس كريم و الفشار هي الابتسامة

بجد اكتر حاجة افتقدتها في الفندق ده هي الابتسامة و خصوصا لو عرف انك مصري
اول ما يعرف أنك مصري تاخد منه ( عدم ابتسام و تطنيش و عدم رد عليك احيانا و هو سامعك و فيهم اللي بيبادر بالهجوم كمان و كأنك جاي تضربه أو تأذيه )
اكتر حاجة فعلا ضايقتني اني طول فترة الإقامة انا كزبون اللي باحاول اهندل اللي بيقدم لي الخدمة عشان يضحك لي مش العكس
اغلب الاستاف (حوالي ٧٠ ٪ ) مبيضحكش ولا بيبتسم ابتسامة بروفيشنال حتى لدرجة محسساني بالذنب أو اني جيت في وقت مش مناسب و هم كانوا نايمين مثلا او متقل عليهم
اغلب الاستاف لو كلمته أو سألته على استفسار بسيط و هو بيعمل حاجة بيتعمد أنه ميردش عليك مهما ناديت عليه و ممكن يخلص كل اللي في أيده و يخلص كام سايح قدامه و بعدين لو لقاك ساكت و هادي و تستطيع معه صبرا ...ساعتها هيرد عليك قبل ما يخلص الشفت بتاعه متقلقش ..

و مع ذلك انا لما لقيت في ناس في وسط الاستاف حلوين و متعاونين حفظت اساميهم و عايز أخرجهم برة القوس ( شيف عبدالرازق اللي عمره ما كشر في وش حد من ٢٥ سنة ولو احتجت اي حاجة في المطعم اطلبها منه و شيف احمد و شيف سعيد و مستر هشام و مستر حسام و كابتن محمد بتاع الفيوم )
ع الشواية ( شيف سامى و شيف ايمن حتتين سكر )
الانيميشن كلهم ( ابو الهنا و ميجو و صفا ) ..چو يبان قافش شوية بس طلع زي العسل هو كمان
اللايف جاردز ( كريم و ابراهيم ..اقسم بالله منتهى الجمال و اللطافة مع الاطفال ..و متابعين شغلهم بطريقة عبقريةو عينيهم علي كل الاطفال و سواء الأهل موجودين أو لأ ..هم بيلاعبوا الاطفال بحب )
أحمد لايف جارد ع الأكوا بارك تحديدا لعبة تسونامي ..معرفش اسمه احمد ايه بس كان زي العسل برضه و ضحكته سابقاه )

شارميليون اكوا بارك كتجربة هي تجربة لطيفة
اظن اللي شتمه بأبشع الالفاظ هو شخص افتقر المعاملة الحلوة و الابتسامة و الاهتمام جوة الفندق فترجمها بشتيمة في الفندق ككل
و اظن ان اللي شكر في الفندق بزيادة مكنش مهتم بالجانب الإنساني فيه أو مكانش مصري أو كان ابن صاحب الفندق
الفندق عموما مش كبير جدا و مش ضيق جدا
مناسب كحجم
و إشغاله مش زحمة زي ما يبان لاول وهلة بالعكس تماما
و اغلب اشغاله اجنبي إسرائيليين بنسبة كبيرة جدا
تجربة الحمدلله كانت احسن مما توقعت من حيث الاكل و جودته و تنوعه و من حيث الغرف و نضافتها لكن كشخص يميل للجانب الاجتماعي و الابتسامة و الزوق نوعا ما فغالبا مش هاكرر تجربتي فيه تاني رغم اني اتبسطت و راضي بيها .
المزيد