هذا المنتجع من افضل الاماكن التى قمت بزيارتها و ذلك من حيث حسن الاستقبال و الضيافة و نظافة المكان بصفه عامه مع وجود اسرار من ادارة هذا المكان على تنوع المأكولات مع تدنى الاسعار و احب ان اشكر مستر طارق احمد مدير عام المنتجع على وجوده الدائم لمتابعة راحة النزلاء و سوف اعاود الزيارة فى شهر فبراير القادم ان شاء الله
Booking.comBooking.comBooking.com
بداية تعاقدت مع شركة الهنا هوليدايز بميدان عبد المنعم رياض و حجزت لنا غرفة دبل تكلفة الفرد 1400 جنيها و الطفل 720 نهاية اغسطس 2017 اقامة كاملة وللاسف تكييف الباص اتعطل و وصلنا شرم بعدرحلة سفر استغرقت 14 ساعه من الارهاق و البهدله و فوجئت ان مفيش حجز و طلب مني موظف الريسبشن انى اتصل على موبايلي علشان ااكد الحجز و استغربت من هذا التصرف و و استلمت الغرفة بعد اكتر من ساعه و طبعا ضاعت وجبة الغداء مع وعد من الشركة بالحصول على وجبة الغداء اخر يوم بالفندق: المساوء بعض الشيفات اتعاملوا بمنتهي قله الذوق و كأنك بتشحت حقك منهم وانا بجبب ايس كريم ليا و لاسرتي بيقولى هما فين ؟؟ عمري ما اتعرضت للموقف دة في حياتى . الغرفة رائحتها كريهه زى المجاري بالظبط و خصوصا في الحمام ووجدت صرصار شيء مقزز . الاكل سيء للغاية و مكرر تقريبا اصناف ثابته و اصناف متغيرة . العيش الشامى مجلد و السلطات مش شلطلت اصلا مجرد خضار مبشور و مش طازة دة غير اللحوم و الفراخ سئية المذاق الفاكهه فقط المعقوله هى و الفطار . المشروبات بتتقدم للمصريين في كوبيات بلاسيتك العادية اما الاجانب بتتقدم لهم بطرق اشيك و مخدومة جدا و انت كمصري مش هتحصل علي نفس الميزة الا حسب مزاج الويتر و رضاه عنك خدمة الغرف انت بتشحت الشامبو و الصابون مش بيحطوها بنفسهم و دة لا يليق بفندق خمس نجوم اطلاقا المفروض دة واجب بيتعمل اتوماتك مش مطلوب منى اترجاه يتعمل . اخر يوم رفضوا انى اخد وجبة الغدا و قالوا ممنوع رغم وعد الشركة بكدا لولا استاذ على من ادارة المطعم كان على علم بمشكلة الشيف و قله ادبة معايا فترجى مديره ناخد وجبة مخبوزات و فاكهه بدل الغدا ... بردة احساس مش لطيف و انت عمال تشحت حقك و الشركة مكلفتش خاطرها تعوضنى عن المساويء دي مفيش حفلات غير مين يديسكو للاطفال و اخر يوم مطرب او بيسموه كده تحس انه جاي تقضيه واجب غير كدة مفيش اى فقرات خالص و شعور رهيب بالملل. المطعم ملوش غير باب واحد و دي اول مرة اشوفها في حياتى لازم تلف الكرة الارضيه علشان تدخل المطعمرغم وجود اكتر من باب و لكن مش بيفتوحهم كنوع من التعذيب للنزلاء. مميزات الفندق المشرفين على حماما السباحة عينهم عليه طول الوقت فده امان للاطفال و بعض العاملين كانوا واحد في الريسبشن غير الغرفه لغرفه اقرب و احد العاملين في المطعم شاب صغير كان دايما يسالنا محتاجين حاجة و لكن دى حالاات فردية لان باقي العاملين متجهمين و خصوصا اللي بيقف على باب المطعه تحس انه مخبر و على طول قرفان و كأنه شغال في سجن مش مطعم فندق خمس نجوم . التجربة في عمومها سئية و خلتنى الغي شرم من رحلاتي خلاص
للي بيدور على فندق راقي ومحترم في شرم الشيخ ، له طابع عائلي مميز ، وبيهتم كتير بالأطفال ، وكمان هادي ويشجعك على الاسترخاء ، لازم ينزل في شرم جراند بلازا،،،
كان اختياري للفندق بعد بحث دقيق ومتكرر في كل مواقع التواصل الاجتماعي المشهورة وبعد سؤال أهل الخبرة ، وكمان بترشيح من الشركة اللي اخدتني وأسرتي وتكفلت بكل كبيرة وصغيرة ، والحقيقة كان واضح جدا الاهتمام من أول ما وصلنا وحرص الادارة الواضح على راحتنا والاستمتاع بكل دقيقة من وقتنا وكمان اصرار كل العاملين على تلبية طلباتنا،،،
بدأ الاهتمام لما أخدنا وجبة الغدا أول ما وصلنا الفندق برغم وصولنا متأخر ، ولاقيت المطعم بيقدم تلات وجبات بوفيه مفتوح ومتنوع كل يوم وبيرضي كل الأذواق ، وعجبني جدا تجهيز بعض الأصناف قدام عنينا يوميا وفي كل وجبة وبكميات كبيرة جدا، وكمان تخصيص مكان داخل المطعم خاص للأطفال بيقدم بوفيه مفنوح وجلسات مناسبة ليهم وبين الوجبات لاقيت خدمات المشروبات السخنة والساقعة بكل أنواعها وسناك على حمامات السباحة طول اليوم ،،،
اخترت غرفة عائلية فلاقيت كل الغرف العائلية هي الأقرب لحمامات السباحة وكبيرة والمنظر قدامها يهدي الأعصاب ، وكمان قريبة جدا من منطقة مخصصة للأطفال وفيها حمام سباحة ومنطقة ألعاب خاصة بتراعي المواصفات العالمية في الراحة والأمان ، ورغم استمتاع أطفالي بحمام السباحة المشترك إلا انهم بيطلبوا ينزلوا كل يوم في حمام السباحة الخاص بالأطفال،،،
نشاط فريق الانيميشن مميز جدا وحاضر طوال اليوم ، تلاقيهم على حمامات السباحة بينظموا تدريبات أكوا في الماية للكبار والصغار ، وتلاقيهم بيلعبوا كرة مائية مع النزلاء ، وتلاقيهم بعد العشا على المسرح في برنامج خاص للأطفال ، وأشهرهم كان مستر أحمد فصيح اللي أولادي كانوا بيدوروا عليه في كل مكان بيروحوه في الفندق،،،
أما السلبيات فكان معظمها من النزلاء !!! اللي يكح في المطعم لدرجة اني أحس برزاز الكحة على ايدي وأنا شايل الطبق!!! واللي بيدوق الزبادي بمعلقة الغرف الكبيرة ويرجع المعلقة جوا الزبادي!!! واللي بياخد من صواني الاكل بايده او يغرف بهمجية لدرجة ان المكان بين الصواني كأنه ساحة معركة!!! غير كميات الأكل الكبيرة الباقية في الأطباق وكمان خروج النزلاء بكميات ضخمة من الأكل خارج المطعم مع إنه ممنوع ومكتوب باللغة العربية بشكل واضح عند باب المطعم!!! والتصرف الخاطئ والهمجي في استخدام الحمامات بجوار المطعم!!! وغيره،،،
عايز أوصف أكتر وأتكلم كتير عن ايجابيات الفندق لكن تعبت من الكتابة ، والحقيقة إدارة الفندق متميزة وفريق العمل يستحق الشكر والتقدير ، وعلى رأسهم مستر طارق أحمد المحترم ، ومستر علاء وكل مجموعة الاستقبال ، والشيف الكبير قوي تامر الوكيل والشيف حمدي وكل العاملين بالفندق ،،، ربنا يوفقهم ويعينهم ويجمعنا على الخير في الإجازات القادمة بإذن الله
الغرفه جميله جدا ومتوفر بها كل شئ والخدمة مميزه والمفروشات نظيفه والنظافه العامه على أكمل وجه ...والاثاث بحاله جيده وموقع الغرفه ترى الفندق والبحر وحمامات السباحه و الهاوس كيبر محترم جدا ومتواجد دائما ......واشكر جميع العاملين للفندق فعلا ناس محترمه جدا ومتعاونه....والشكر الخاص ل مستر علاء مدير الرسيبشن للاهتمام فى موقف خاص حدث ل ابنى
الفندق جميل جدا جدا والموظفين هناك كويسين جدا والمكان رائع بس مشكلته الوحيده ان البحر كله صخرى مفيش غير منطقة صغيرة بس الى تعرف تنزل فيها بس لو انت من هواة عمل اسنركلينج هتتمتع هناك جدا وبنسبة للاكل متنوع جدا ممكن تختار الى انت عايزة والفندق نظيف جدا وكذالك المطعم
مكان اكثر من رائع انا موجوده في الفندق حالا وقضيت يومين رووووعه ولسه همشي بعد الغد. اداره محترمه وفريق العاملين في الفندق كلهم ممتازززين ومجتهدين لاقصي درجه من اجل راحة الافراد والمطعم تحفه بجد وفي تنوع في الاصناف وكميات تكفي الناس كلها ونظافه في كل حاجه قبل مااجي كنت بشوف التعليقات بس انا شوفت ده في الواقع علشان كده حبيت اوضح اللي شوفته بجد بما يرضي الله لان في تعليقات قرأتها حديثا بتشوه الصوره وانا نفسي كنت قلقانه لما شوفتها بس لقيتها فعلا مش حقيقي .بجد شكرا لادارة الفندق وكل العاملين فيه وديه ابسط حاجه ممكن الواحد يقولها في حقهم .
