اعمل ريفيو عن اكتشاف راءع
"فندق سيناواي راس سدر"
من ١٩ يوليو ل ٢٣ يوليو ٢٠٢٢ (٥ ايام ٤ ليالي )
غرفة رقم ١٣١٥
هبتدي بالمميزات اللي شايفاها من وجهة نظري فالمكان وعجبتني:

- الفندق على مسافة ساعتين ونص من القاهرة دا لو بالرست لو من غير يبقى ساعتين مش محتاج تسافر بالساعات عشان تروح مكان حلو
-اولا الفندق كمبنى كبير جدا جدا جدا وكعدد غرف
-الغرف واسعة وكلها فيها فيو سواء العالي او الارضي عالبيسين وعالبحر ودي فنظري من اهم المميزات والفيو بيجيب لحد السفن البعيدة انت بتكون شايفها يعنى ممكن كمان تحضر الشروق من الغرفة كانها بانوراما
- مستوى النظافة كويس الغرف بتتنضف باستمرار
-مكنش فيه حشرات يعني كنت بقدر اقعد بالليل فالبلكونة احضر ال show او اسهر مكنش فيه ناموس او برص او اي حشرة
- فيه انيميشن للأطفال بالليل وكان لطيف اوي كان فيه fire show حلو واتعمل مرتين وكمان فيه دور مخصص بلالعاب بلياردو وبينج وبيبي فوت وشطرنج كبير جدا والالعاب جديدة مش متهالكة خالص (مش عارفة فيه العاب تانية ولا لا)
-مستوى الاكل حلو بالنسبة لفندق ٣ نجوم ونص (هو لا يقل عن ال ٤ وال ٥ نجوم فنظري) وفيه تنوع في الأصناف (كنت واخدة فطار وعشا) الفطار متنوع مابين الشرقي والغربي والعشاء كل يوم كان فيه فراخ ولحمة وسمك وكل يوم معمولين بطريقة مختلفة وفيه تنوع في الحلويات وفي الأصناف عامة
-نتكلم عن اهم واحلى جزء فالفندق "البحر" 🏊‍♀️اولا دا أكبر شاطيء شفته حقيقي "مالوش حدود فعلا" في نص الشط فيه مارينا طويلة وكبيرة والمارينا فيها ٢ سلم لنزول البحر وده بردو مالحاجات اللي عجبتني اوي كفكرة عشان متمشيش كتير فالبحر عشان توصل لمكان مناسب لطولك تعرف تعوم فيه ... اول سلم وده قبل نص المارينا وبيكون واصل للارض وفيه طول والسلم التاني في آخر المارينا دا للناس اللي بتعرف تعوم في حتت مفيهاش طول عجبني كمان ان اننا ممكن نستخدم المارينا كا ضلة من الشمس وقت ما بتكون في البحر ... كمان في نهاية المارينا فيه بالعرض كراسي (شبه الشازلونج) طويلة للاسترخاء ولو عاوز تحضر الغروب او تقعد وسط النجوم بالليل بتكون راءعة وكمان فيه ناس كانت بتصطاد عالمارينا
-متوفر انشطة عالبحر زي ال jetski وال banana boat ورحلة باليخت لمدة ساعتين فالبحر
-مية البحر نضيفة الشاطيء رملي في الجزء اللي كنت بعوم فيه عند السلم الاولاني لكن فيه حتت فيها صخور بسيطة فا يفضل انك تلبس جزمة عشان متحسش بحاجة
-عجبني كمان انه فيه ممر بتمشي فيه من الفندق للبحر بيكون ضلة ومغطى بالزرع، لان فيه مسافة مشي بين الفندق والبحر حوالي ٥ دقايق فا عجبتني فكرة الممر المغطى عشان الناس اللي بتهرب من الشمس زيي
- نتكلم عن البيسين...البيسين كبير اوي اوي اوي وتصميمه حلو جدا كشكل وكمان فيه فوق البيسين زي كوبري على شكل قبة كده بتربط بين اجزاءه بردو حلو اوي للضلة 🤚😉 والناس اللي بتهرب من الشمس ...البيسين فيه كذا طول ١٢٠ و١٤٠ و١٦٠ (انا مجربتهوش لاني بحب البحر اكتر بس شكله كان عجبني اوي ) والقاعدة عالبيسين بالليل حلوة اوي والواي فاي كان واصل للبيسين

حابة احكي كام موقف فرقوا معايا اوي وحببوني في المكان:
-اولا التسكين كان سريع مخدناش وقت ..كنت واخدة غرفة سينجل لاني كنت طالعة لوحدي لما دخلت لقيت فيه سريرين فا انا كنت عاوزة سرير واحد كبير فا رجعت للريسيبشن وبدلوهالي
- الناس هناك فالمطعم بجد طيبين اوي وقمة في الذوق والأخلاق والتعامل بجد سهل جدا وهما فعلا بيهتموا بالتفاصيل وبيساعدوك وبيلاحظوا الناس ..لو فيه حاجة ناقصة او محتاج حاجة بيوفروهالك وبسرعة جدا ...مبتسمين دايما وفيه تقدير كده في المعاملة وكرم غير طبيعي هما عاوزينك تنبسط عندهم
-ممكن ابقى حجزت الترابيظة اللي هقعد عليها عقبال ما اجيب الاكل ارجع الاقي الشركة والسكينة والمعلقة والمنديل اتحطوا
-الشيف (للأسف مش عارفة اسمه) بس هو أكبر واحد فيهم كان لطيف اوي وذوق جدا معايا وبيسألني عن رأيي فالاكل وكان بيسألني لو عاوزة كمية اكبر
- رابع يوم كان آخر يوم ليا و شخص من مسؤولين المطعم اسمه استاذ عرفات (شخص راءع وذوق اوي اوي 😇🌹) سألني عالفطار محتاجة حاجة يا فندم ...قلتلو النهاردة آخر يوم ليا وفيه صنف من الاكل اللي اكلته في اول يوم عجبني اوي ..ممكن تعملوه فالعشا النهاردة ..وبسرعة راح يسأل هل ينفع يتعمل مخصوص وفعلا قاللي هنعملهولك مخصوص يا فندم وهخللي الشيف يجهزه وفعلا بالليل لقيت الصنف جاهز مخصوص ليا 😍 واكلت بردو من الحاجات التانية عشان كنت جعانة اوي 😅
-مثلا انا مش بعرف اكل الفاكهة بعد الحادق على طول فا كنت بطلب اني الفها عشان اخدها أكلها بعدين وكانوا بيلفوهالي مفيش مشكلة
-اخر يوم للأسف عالفطار كانت الكهربا قاطعة فا مكنش فيه اومليت فا لقيتهم من نفسهم حطولي بيض مسلوق (حاجات تبان صغيرة وبسيطة بس حقيقي بتفرق )

-عاوزة اتكلم عن مدير المكان استاذ "ناجي" شكرا على التعامل السهل لما طلبت منه انزل البحر عالساعة ٥ الفجر لاني عندي حساسية من الشمس قاللي مفيش مشكلة وسابني على راحتي وقدر الموضوع (لان نزول البحر بيبدأ من ١٠ الصبح تقريبا)...هو شخص لطيف وبيهزر بطريقة غير مباشرة وخفيفة 😄 وده مع الكل وحابب الناس تكون مبسوطة ...وأعتقد دا تأثير الإدارة الناجحة عالمكان وعلى العاملين 😊
-حابة اتكلم كمان عن نقطة الأمان والاحترام ليا كبنت المكان فعلا آمن جدا لأي بنت حابة تطلع لوحدها مفيش اي حد من العاملين ضايقني وحتى لما كنت بنزل البحر كان فيه حد بيطمن من بعيد ويمشي

طبعا مفيش حاجة مفيهاش عيوب بس العيوب كانت بسيطة جدا قدام المميزات الكتير :
-مثلا الواي فاي منعدم فالغرف بس لو طلعت البلكونة هيلقط وهيشتغل كويس جدا معاك
-للأسف رحت فوقت كان فيه مشكلة فالكهربا على مستوى راس سدر كلها ودا كان مشكلة عامة خارجة عن الفندق فا الكهربا كانت بتقطع بس فيه اوقات كانت بترجع بسرعة واوقات كانت بتطول بس مكنتش بحس ب حر لان الجو ف راس سدر حلو جدا جدا ومفيش اي حر او رطوبة زي جو الغردقة
- من العيوب بردو ان مفيش ميه معدنية فالغرفة لكن فيه كولر (مبرد الميه) فالمطعم او لازم تشتري من البازار بصراحة مش عارفة سعر الازازة بكام هناك (انا كنت جايبة المية بتاعتي معايا) لو مش بيفرق معاك اشرب من الكولر (مبرد الميه) 🙂
دي العيوب اللي كنت شايفاها بس بردو مش عيوب عاملالي أزمة كبيرة عيوب بسيطة بالنسبالي وعرفت اتعايش معاها واستمتع بالمكان

ملحوظة: الفندق مفيهوش اجانب كله مصريين
مفيش خمور او Hard drinks👌👍

الفندق مصنف انه ٣ نجوم ونص بس بصراحة وبمنتهى الأمانة انا حقيقي شايفه انه خدمة ٧ سبع نجوم 😊على المعاملة اللطيفة والذوق واحترام وتقدير الناس وكمان المميزات اللي فيه
بكتب الكلام ده لانه حسيت ان دي أقل حاجة اقدمهالهم عالاجازة الجميلة والوقت الحلو اللي قضيته هناك...المكان مريح فعلا نفسيا ...
محدش طلب مني اكتب ريفيو انا كتبت من فرحتي 🤗 وكمان عشان البنات اللي بتحب تسافر وبتدور على أماكن تكون آمنة ونضيفة ومريحة وقريبة ومحدش يضايقها ...شكرا

كانت رحلة رائعة مع الأسرة الفندق رائع وجميل وموقعة قريب جدا من القاهرة والاستف ودود جدا والبحر لديهم رائع وجميل والشط رملي والمارينا جميلة والصيد جميل جدا بالليل خاصة مع ضوء القمر الذي يعطي منظر جميل جدا للمياة